தனுசு- 2026 தமிழ்ப்புத்தாண்டு ராசிபலன்

மூலம்

திருப்புமுனையான சம்பவங்கள் நடக்கும் வருடம். அனைத்து முயற்சிகள் வெற்றியாக அமையும். மனதில் தைரியம் குடிபுகும்.

குடும்பத்தை விட்டுப் பிரிந்து சென்ற உறவுகள் மீண்டும் நட்பு கரம் நீட்டுவார்கள். வாழ்வின் முன்னேற்றப் பாதையை நோக்கி பயணிப்பீர்கள். பொருளாதார பற்றாகுறை அகலும் பூர்வீகச் சொத்துக்களின் மூலம் வருமானம் கிடைக்கும்.

தவிர்க்க முடியாத சுப விரயங்கள் அதிகரிக்கும். தடை,தாமதம்,இன்னல்கள் நீங்கி அற்புதமான சுப பலன்கள் நடக்கும். உடன் பிறந்தவர்களின் திருமணம், குழந்தை பேறு போன்ற கடமைகளை முன் நின்று நடத்துவீர்கள். விலை உயர்ந்த பொருட்களின் சேர்க்கை மகிழ்ச்சியை அதிகரிக்கும். ஆன்லைன் சாதனங்களை வாங்குவதில் ஆர்வம் கூடும்.

உத்தியோகம் அல்லது தொழில் மாற்றங்களை சந்திக்க நேரும். பதவி உயர்வுடன் கூடிய பணியிட மாற்றம் கிடைக்கும். மாணவர்களுக்கு ஞாபக சக்தி அதிகரிக்கும்.பொதுத் தேர்வில் அதிக மதிப்பெண் பெற்று சாதனை புரிவீர்கள்.

பூராடம்

மேன்மையான எண்ணங்களும் சீரிய சிந்தனைகளும் பெருகும் வருடம்முட்டுக் கட்டைகள் அகலும். முயற்சிகள் உடனே பலிதமாகும்.புகழ், அந்தஸ்து கவுரவம் நம்பிக்கை, நாணயம் உயரும். உங்களின் முயற்சிக்கு வாழ்க்கைத் துணை, பிள்ளைகள் ஆதரவாக இருப்பார்கள்.

இடமாற்றம் ,தொழில் மாற்றம், வேலை மாற்றம், வெளிநாட்டு வாய்ப்பு என்று நீங்கள் எதிர்பார்த்து காத்து இருந்த மாற்றங்கள் நடக்கும். வேற்று மொழி பேசுபவர்களால் நன்மைகள் தேடி வரும். வேற்று மத நம்பிக்கை கூடும். தம்பதிகள் ஏதேனும் காரணமாகவோ வெவ்வேறு ஊர்களில் பிரிந்து வாழ்ந்து கொண்டிருந்தால் இப்பொழுது ஒன்றாக இணைந்து மகிழ்ச்சிகரமாக இல்லறம் நடத்தலாம். இதுவரை அரசுவழி ஆதாயம் ,உத்தியோகத்தில் இருந்து வந்த தடை தாமதங்கள் சரியாகி விடும்.

திருமண வாய்ப்பு தேடி வரும். பிள்ளைகளுக்கு கல்வி ஆர்வம் கூடும்.பூர்வீகம் தொடர்பான சர்ச்சைகள் முடிவுக்கு வரும்.

உத்திராடம் 1

வெற்றி மேல் வெற்றி தேடி வரும் வருடம்.தடைபட்ட அனைத்து முயற்சிகளும் வெற்றியை தரும்.எதிர்காலத் தேவைக்காக திட்டமிடுவீர்கள். மனவேதனை மாறும். எடுத்த காரியங்கள் வெற்றி பெறும்.பணிகளை விரைந்து முடிப்பதில் வேகம், விவேகம் இருக்கும். வாழ்வியல் மாற்றம் தரும் இடப்பெயர்ச்சி நடக்கும்.வீடு மாற்றம் ஊர் மாற்றம் நாடு மாற்றம் வேலை மாற்றம் என அவரவர்களின் தசா புத்திக்கு ஏற்ப விரும்பத் தகுந்த மாற்றங்கள் நடக்கும்.

உடன் பிறந்தவர்களுடன் ஏற்பட்ட கருத்து வேறுபாடு சீராகி பாகப்பிரிவினை சுமூகமாகும். ஞாபக சக்தி அதிகரிக்கும். காணாமல் போன பொருட்கள் தென்படும்.கமிஷன் அடிப்படையான தொழிலில் லாபம் கூடுதலாகும். வீட்டில் சுப நிகழ்வுகள் நடக்கும். ஆரோக்கியம் சீராகும்.

பயணங்கள் மிகுதியாகும். கணவர் மற்றும் பிள்ளைகளால் மகிழ்ச்சியும் நிம்மதியும் நிரம்பும். வீண் செலவுகளை குறைத்தால் மன அமைதி கூடும். மாமனாரால் சிறு சிறு இன்னல்கள் தோன்றி மறையும்.

திருமணம்

ராசி அதிபதி குரு பகவான் அஷ்டம ஸ்தானத்தில் நின்று குடும்ப ஸ்தானத்தை பார்ப்பதால்பல வருடங்களாக தடைபட்ட திருமண முயற்சியில் சாதகமான திருப்பம் ஏற்படும். மறு விவாக முயற்சி வெற்றி தரும்.

பொருளாதாரம்

திடீர் அதிர்ஷ்டம் உங்களை வழிநடத்தும்.தடைகள் விலகி மன நிம்மதி கூடும்.பங்குச் சந்தை மற்றும் யூக வணிகம் உங்களுக்கு அதிர்ஷ்டமாக செயல்படும். வீண் செலவுகளை குறைத்து சிக்னத்தை கடைபிடித்தால் சேமிப்பு உயரும்.

ஏதேனும் காரணத்தால் இதுவரை ஊதியம் வராமல் தடைபட்டு இருந்தால் மொத்தமாக வந்து விடும்.மந்தமான தொழில் சூடு பிடிக்கும். இரவு பகல் பார்க்காமல் கடுமையாக உழைப்பீர்கள்.செலவுகள் அதிகரிக்கும். அதற்கு தகுந்த வரவும் இருக்கும். வங்கிக் கடன் கிடைக்க வாய்ப்பு உள்ளது.

பெண்கள்

சொல்லாலும் செயலாலும் ஒன்று பட முடியும். நிகழ்கால, எதிர்கால தேவைகள் பூர்த்தியாக கூடிய வகையில் தாராள தன வரவு உண்டாகும்.தங்கம், வெள்ளி, அழகு, ஆடம்பரப் பொருட்கள் அதிகம் சேரும்.அரசு சார்ந்த துறைகளால் ஆதாயம் உண்டு. உத்தியோகத்தில் நிலவிய சங்கடங்கள் விலகும். சிலர் வியாபாரத்தை விரிவு செய்வார்கள்.

அதிர்ஷ்டம் சார்ந்த விஷயங்கள் பலன் தரும். பிள்ளைகளுக்கு சுப விசேஷங்கள் நடத்துவீர்கள். புத்திர பிராப்தம் உண்டாகும்.வாடகை வீட்டில் வசித்தவர்கள் சொந்த வீட்டில் குடியேறுவார்கள்.

பரிகாரம்

மும்மூர்த்திகளின் அருளையும் வழங்க கூடிய தத்தாத்ரேயரை வழிபட ஆனந்தமான மாற்றங்கள் ஏற்படும்.