பெண்கள் திரண்டு வந்து அந்தியூர், பவானி சாலை அருகே சாலையில் அமர்ந்து மறியல் போராட்டத்தில் ஈடுபட்டனர்.
ஈரோடு மாவட்டம் அந்தியூர் அருகே உள்ள செம்புளிச்சாம்பாளையம் பாட்டப்பன் கோவில் பகுதியில் 500க்கும் மேற்பட்ட குடும்பங்கள் வசித்து வருகின்றனர்.
இந்தப் பகுதியில் கடந்த சில நாட்களாக வேறு பகுதிகளில் இருந்து கொண்டு வரப்படும் சாயக்கழிவுகளை மர்ம நபர்கள் கொட்டி செல்வதாக கூறப்படுகிறது.
பெண்கள் திரண்டு வந்து அந்தியூர், பவானி சாலை அருகே சாலையில் அமர்ந்து மறியல் போராட்டத்தில் ஈடுபட்டனர். இதனால் சாலையின் இருபுறம் வாகனங்கள் நீண்ட தூரம் அணிவகுத்து நின்றன.
இந்த சாய கழிவு காரணமாக இப்பகுதி பொதுமக்களுக்கு நோய் தொற்று அபாயம் ஏற்பட்டுள்ளது.
இதனால் இந்த பகுதி சேர்ந்த பொதுமக்கள் சாயக் கழிவுகளை கொட்டுவதை தடுக்க வேண்டும் என வலியுறுத்தி வந்தனர். ஆனால் இதுவரை எந்த ஒரு நடவடிக்கையும் எடுக்கவில்லை என கூறப்படுகிறது.
இந்நிலையில் இன்று காலை அந்த பகுதியை சேர்ந்த பெண்கள் திரண்டு வந்து அந்தியூர், பவானி சாலை அருகே சாலையில் அமர்ந்து மறியல் போராட்டத்தில் ஈடுபட்டனர். இதனால் சாலையின் இருபுறம் வாகனங்கள் நீண்ட தூரம் அணிவகுத்து நின்றன. போக்குவரத்து அந்த பகுதியில் கடுமையாக பாதிக்கப்பட்டது.
இது குறித்து தகவல் கிடைத்ததும் அந்தியூர் இன்ஸ்பெக்டர் சண்முக வேலு, சப்-இன்ஸ்பெக்டர்கள் செந்தில் லாரன்ஸ், அசோக் குமார் உள்பட போலீசார் சம்பவ இடத்துக்கு விரைந்து வந்தனர் மேலும் அவர்களுடன் வருவாய் துறைக்கும் தகவல் தெரிவிக்கப்பட்டு நில வருவாய் ஆய்வாளர் வளர்மதி மற்றும் கிராம நிர்வாக அலுவலர்கள் சம்பவ இடத்திற்கு வந்து மறியல் போராட்டத்தில் ஈடுபட்ட பொதுமக்களிடம் பேச்சுவார்த்தை நடத்தினர். அப்போது பொதுமக்கள் கூறும்போது:-
எங்கள் பகுதியில் 500க்கும் மேற்பட்ட குடும்பத்தினர் வசித்து வருகின்றனர். குழந்தைகள் அதிக அளவில் இருக்கின்றன. இந்நிலையில் கடந்த சில நாட்களாகவே வேறொரு பகுதியிலிருந்து கொண்டு வரப்படும் சாயக்கழிவு எங்கள் பகுதியில் கொட்டப்படுகிறது இதனால் எங்கள் பகுதியை சேர்ந்த பொது மக்கள் வயதானவர்கள் குழந்தைகள் கடுமையாக பாதிக்கப்பட்டுள்ளனர் உடல் ரீதியான பிரச்சினைகள் ஏற்படும் அபாயம் உள்ளது. உடனடியாக அந்த சாய கழிவுகளை எங்கள் பகுதியிலிருந்து அகற்ற வேண்டும்.
மேலும் எங்கள் பகுதியில் இது போன்ற சாயக் கழிவுகளை கொட்டாத அளவிற்கு போலீசார் கண்காணிக்க வேண்டும் என்றனர்.
அதற்கு அதிகாரிகள் உயர் அதிகாரிகளிடம் சொல்லி நடவடிக்கை எடுக்கப்படும் என்று கூறி தொடர்ந்து பேச்சுவார்த்தை நடத்தி வருகின்றனர். இதனால் அந்த பகுதியில் பரபரப்பான சூழ்நிலை நிலவி வருகிறது.
