மீன்சுருட்டியில் விபத்தை ஏற்படுத்த காத்திருக்கும் குண்டும், குழியுமான சாலை

மீன்சுருட்டி:

அரியலூர் மாவட்டம் மீன்சுருட்டி சந்தையில் இருந்து முக்குளம் வழியாக முத்துசேர்வாமடம் கிராமம் வரை சுமார் 2 கிலோ மீட்டர் தூரமுள்ள சாலை குண்டும், குழியுமாக மிகவும் மோசமாக காணப்படுகிறது.

சமீபத்தில் பெய்த மழையால் அந்த சாலை மேலும் மோசமடைந்து மோட்டார் சைக்கிள் உள்பட இருசக்கர வாகனங்கள் கூட செல்ல பயனற்றதாக உள்ளது.

இந்த சாலையை சத்திரம், பாகல்மேடு, பிச்சனூர், வெத்தியார் வெட்டு, இளையபெருமாள் நல்லூர் உள்ளிட்ட சுற்றுவட்டாரத்தை சேர்ந்த ஏராளமான மக்கள் பயன்படுத்தி வருகின்றனர். இந்த சாலை வழியாகதான் பெண்கள் மேல்நிலைப்பள்ளிக்கு செல்ல வேண்டும்.

9 மற்றும் 11-ம் வகுப்புகள் தொடங்கப்பட உள்ளது. இந்த சாலையில் மாணவிகள் சைக்கிளில் கூட சிரமத்துடன் தான் செல்ல வேண்டும். ஏற்கனவே இரவு நேரங்களில் இந்த வழியாக செல்லும் வாகன ஓட்டிகள் விபத்தை சந்தித்து வருகின்றனர். எனவே சம்பந்தப்பட்டவர்கள் இந்த சாலையை இனிமேலாவது சீரமைக்க வேண்டும் என்று பொதுமக்கள் கோரிக்கை விடுத்துள்ளனர்.