நியூசிலாந்து வேகப்பந்து வீச்சாளர் டிரென்ட் போல்ட் மும்பை அணிக்காக விளையாடி வருகிறார். நேற்றைய இறுதிப் போட்டியில் அவரது பந்து வீச்சு அபாரமாக இருந்தது. அவர் 30 ரன் கொடுத்து, 3 விக்கெட் வீழ்த்தினர். இந்த சீசனில் அவர் மொத்தம் 25 விக்கெட் கைப்பற்றி 3-வது இடத்தை பிடித்தார்.
போல்ட் ஆட்டத்தின் முதல் பந்திலேயே டெல்லி தொடக்க வீரர் ஸ்டோய்னிஸ் விக்கெட்டை வீழ்த்தினார். அவர் இதன்மூலம் இந்த சீசனில் முதல் ஓவரில் 8 விக்கெட் கைப்பற்றினார்.
ஒரு சீசனில் முதல் ஓவரில் அதிக விக்கெட் கைப்பற்றி போல்ட் புதிய சாதனை படைத்தார். 2016-ம் ஆண்டு புவனேஷ்வர் குமார் 6 விக்கெட்டும், 2013-ல் பிரவீன் குமாரும், 2012-ல் ஜாகீர் கானும் தலா 5 விக்கெட்டுகளை முதல் ஓவரில் கைப்பற்றி இருந்தனர்.