“புதிய செருப்பு கடிக்கவே செய்யும்”: ஜி.எஸ்.டி.க்கு ஆதரவாக மத்திய மந்திரி கருத்து

இந்தூர்:

மத்திய திறன் மேம்பாட்டுத்துறை மந்திரி தர்மேந்திர பிரதான், நேற்று மத்தியபிரதேச மாநிலம் இந்தூர் அருகே ஒரு விழாவில் பங்கேற்றபோது, நிருபர்களுக்கு பேட்டி அளித்தார். அப்போது, பண மதிப்பு நீக்கம், ஜி.எஸ்.டி. ஆகியவற்றுக்கு எதிரான கருத்துகள் குறித்த கேள்விக்கு அவர் கூறியதாவது:-

நீங்கள் புதிய செருப்பு வாங்கும்போது, முதலில் சில நாட்களுக்கு கடிக்கவே செய்யும். பிறகு அணிவதற்கு வசதியாக இருக்கும். அதுபோல்தான் இதுவும். இந்த நடவடிக்கைகளால், வேலைவாய்ப்பு பறிபோய் விட்டதாக தேவையின்றி ஒரு மாயை உருவாக்கப்படுகிறது.

நாட்டை 3 தலைமுறைகளாக ஆண்டவர்கள், இளைஞர்கள் வேலைவாய்ப்புக்காக முதலைக்கண்ணீர் வடிக்கிறார்கள். ஜி.எஸ்.டி. யால், வரி செலுத்துவோர் எண்ணிக்கை அதிகரித்துள்ளது. ஜி.எஸ்.டி. யை ‘கப்பர்சிங் டேக்ஸ்’ என்று ராகுல் காந்தி கூறியிருப்பது, அவரது அநாகரிக போக்கை காட்டுகிறது.

இவ்வாறு அவர் கூறினார்.