திருப்பூர்:
விஸ்கோஸ் பஞ்சின் மீது உத்தேசிக்கப்பட்டுள்ள அபரிமிதமான குவிப்பு வரியை நிராகரிக்க மத்திய நிதியமைச்சருக்கு சைமா வேண்டுகோள் விடுத்துள்ளது.இது குறித்து சைமா (தென்னிந்திய பஞ்சாலைகள் சங்கம்) தலைவர் ரவிசாம் வெளியிட்டுள்ள அறிக்கையில் கூறியிருப்பதாவது:-
இந்தோனேஷியாவிலிருந்து இறக்குமதி செய்யப்படும் விஸ்கோஸ் செயற்கை பஞ்சு மீது கிலோ ஒன்றுக்கு 0.512 அமெரிக்க டாலர் குவிப்பு வரி விதிக்க டி.ஜி.டி.ஆர்.பரிந்துரை செய்துள்ளது. இதை மத்திய நிதியமைச்சகம் நிராகரிக்க வேண்டும். ஜவுளித்தொழிலுக்காக இறக்குமதி செய்யப்படும் மூலப்பொருட்கள், எந்திரங்கள் போன்றவற்றிற்கு 5 முதல் 7.5 சதவீதம் வரை இறக்குமதி வரி விதிக்கப்படுகிறது.ஆனால் விஸ்கோஸ் செயற்கை பஞ்சுக்கு 28 சதவீதம் குவிப்பு வரி விதிப்பது நியாயமற்றது. இது ஒட்டுமொத்த விஸ்கோஸ் செயற்கை பஞ்சு ஜவுளி சங்கிலியை பெரிதும் பாதிக்கும்.
பெரும்பாலான நூற்பாலைகள் பருத்தியுடன் 10 முதல் 15 சதவீதம் வரை விஸ்கோஸ் பஞ்சை கலந்து தற்போதுள்ள வர்த்தக போட்டியில் தக்க வைத்துக்கொண்டுள்ள நிலையில் உத்தேச குவிப்பு வரி, நூற்பாலைகளை கடுமையாக பாதிக்கும். அதனால் அபரிமிதமான குவிப்பு வரியை நிராகரிக்க வேண்டும்.இவ்வாறு அவர் கூறியுள்ளார்.
