இமாச்சலப் பிரதேச சட்டப்பேரவை தேர்தல் இன்று பலத்த பாதுகாப்புடன் நடைபெறுகிறது. 68 தொகுதிகளுக்கும் ஒரே கட்டமாக நடைபெறும் இந்த தேர்தலில் காங்கிரஸ் மற்றும் பா.ஜ.க. இடையே ஆட்சியை கைப்பற்றுவதில் கடும் பலப்பரீட்சை நிலவுகிறது.
காலை 8 மணிக்கு தொடங்கி மாலை 5 மணி வரை வாக்குப்பதிவு நடைபெறுகிறது. இதில் 50,25,941 பேர் வாக்களிக்க உள்ளனர். இந்த தேர்தலில் சுதந்திர இந்தியாவின் முதல் வாக்காளரான 101 வயதான ஷியாம் ஷரன் நெகி என்பவர் வாக்களிக்க இருக்கிறார்.
இவர் இந்தியா சுதந்திரம் பெற்ற பிறகு 1951-ம் ஆண்டு நடைபெற்ற முதல் தேர்தலில் முதல் ஆளாக வாக்களித்துள்ளார்.
அதன்பின்னர் நடைபெற்ற அனைத்து தேர்தல்களிலும் நெகி தனது வாக்கை பதிவு செய்துள்ளார். அவர் இதுவரை 16 பாராளுமன்ற தேர்தல்களிலும், 14 சட்டப்பேரவை தேர்தல்களிலும் வாக்களித்துள்ளார்.
