பாராளுமன்ற குளிர்கால கூட்டத் தொடரில் அரசு தாக்கல் செய்த பல்வேறு மசோதாக்கள் நிலுவையில் உள்ள நிலையில், தனி நபர் சார்பிலும் பல்வேறு விவகாரங்கள் தொடர்பாக மக்களவையில் மசோதாக்கள் தாக்கல் செய்யப்பட்டுள்ளன.
மேற்கு டெல்லி தொகுதி பாஜக எம்பி பர்வேஷ் சாகிப் சிங் தாக்கல் செய்துள்ள தனி நபர் மசோதாவில், அரசு விழாக்கள் மற்றும் கூட்டங்களின்போது அசைவ உணவு வழங்குவதை தடை செய்ய வேண்டும் என கூறியுள்ளார். இதேபோல், அரசு சின்னங்கள் (இலச்சினைகள்) மற்றும் பெயர்களை தவறாகப் பயன்படுத்துவதைத் தடுக்கும் சட்டத்தில் திருத்தம் கேட்டு மற்றொரு மசோதாவும் தாக்கல் செய்துள்ளார்.
எல்ஜிபிடி சமூகத்தினருக்கு ராணுவத்தில் சம உரிமை வழங்கும் வகையில் ராணுவச் சட்டத்தில் திருத்தம் கோரி பாஜக எம்பி ஜகதாம்பிகா பால் மசோதா தாக்கல் செய்துள்ளார்.