சக்தி வாய்ந்த மூன்று பெட்டிகள் உள்ளது. அந்த பெட்டிகளில் உள்ள சக்தியை எடுத்தால் யாரும் வெல்ல முடியாதளவிற்கு ஏலியன் வலிமை பெற்றதாக மாறிவிடும். இதனால், அந்த பெட்டிகளை எடுப்பதற்காக ஏலியன்களின் தலைவன் ஸ்டெப்பின் உல்ப் முயற்சி செய்து வருகிறார். இந்த பெட்டிகள் வொண்டர் வுமன் உலகம், ஆக்குவா மேன் உலகம் மற்றும் பூமியில் இருக்கிறது.
முதலில் வொண்டர் வுமன் உலகத்தில் இருக்கும் அந்த பெட்டியை ஸ்டெப்பின் உல்ப் எடுத்து விடுகிறது. இந்த செய்தியை வொண்டர் வுமன் மூலம் பேட்மேனுக்கு தெரிய வருகிறது. மீதமுள்ள பெட்டிகளை ஸ்டெப்பின் உல்ப் எடுப்பதை தடுக்க வேண்டும் என்று நினைக்கிறார் பேட் மேன்.
இதற்காக, வொண்டர் வுமன், ஆக்குவா மேன், ஃப்ளஸ், சைபார்க் உள்ளிட்டவர்களை ஒன்று சேர்த்து ஸ்டெப்பின் உல்பை அழிக்க நினைக்கிறார் பேட் மேன். ஆனால், அவர்கள் ஒன்று சேர்க்க மறுக்கிறார்கள். இதற்கிடையில், ஸ்டெப்பின் உல்ப், ஆக்குவா மேன் உலகத்தில் இருக்கும் பெட்டியை எடுத்து விடுகிறார்.
இறுதியில் ஸ்டீபன் உல்ப் மூன்றாவது பெட்டியை எடுத்தாரா? பேட் மேனுடன் அனைவரும் ஒன்று சேர்ந்து ஸ்டெப்பின் உல்ப்பின் திட்டத்தை முறியடித்தார்களா? என்பதே படத்தின் மீதிக்கதை.
பொதுவாக டிசி படங்களில் மெதுவாக ஆரம்பிக்கும் திரைக்கதை போக போக சூடுபிடிக்கும். ஆனால், இந்த படத்தில் ஆரம்பத்தில் இருந்ந்து விறுவிறுப்பாக திரைக்கதை நகர்கிறது. மார்வல் படங்களில் தான் விறுவிறுப்பும், திரைக்கதையில் சுவாரஸ்யமும் இருக்கும். தற்போது அதையும் தாண்டி டிசி படம் வெளியாகியுள்ளது. டிசி ரசிகர்களுக்கு இந்த படம் விருந்தாக அமைந்திருக்கிறது.
கிராபிக்ஸ் காட்சிகள் அனைத்தும் ரசிக்கும் படி உள்ளது. குறிப்பாக, ஸ்டெப்பின் உல்ப் தோற்றம், சண்டைக்காட்சிகள் அனைத்தும் பிரம்மாண்டமாக உள்ளது. வொண்டர் வுமனின் எண்ட்ரி காட்சி சிறப்பு. வொண்டர் வுமன் உலகத்தில் முதல் பெட்டியை ஸ்டெப்பின் உல்ப் எடுக்கும் காட்சியும் அருமை. தமிழ் மொழியில் டப் செய்யப்பட்டு காமெடியுடன் படத்தை கொடுத்திருக்கிறார்கள். பின்னணி இசையும், ஒளிப்பதிவும் படத்திற்கு பெரும் பலம் சேர்த்திருக்கிறது.