இந்திய சந்தையில் டி.வி.எஸ். மோட்டார் வாகன விற்பனை சரிவு

இந்திய சந்தையில் கடந்த ஆண்டு டிசம்பர் மாதத்தில் டி.வி.எஸ். மோட்டார் நிறுவனத்தின் வாகனங்கள் விற்பனை 15 சதவீதம் சரிந்து (2.71 லட்சத்தில் இருந்து) 2.31 லட்சமாக குறைந்து இருக்கிறது. இந்நிறுவனத்தின் இரு சக்கர வாகனங்கள் விற்பனை 17 சதவீதம் சரிவடைந்து (2.58 லட்சத்தில் இருந்து) 2.15 லட்சமாக குறைந்துள்ளது.

இதில் உள்நாட்டு விற்பனை 25 சதவீதம் குறைந்து 1,57,244-ஆக இருக்கிறது. முந்தைய ஆண்டின் இதே மாதத்தில் அது 2,09,906-ஆக இருந்தது. மோட்டார்சைக்கிள்கள் விற்பனை 93,697-ஆக உள்ளது. 2018 டிசம்பரில் அது 1.07 லட்சமாக இருந்தது. ஸ்கூட்டர்கள் விற்பனை (91,480-ல் இருந்து) 74,716-ஆக குறைந்துள்ளது.

இந்நிறுவனத்தின் ஏற்றுமதி 22 சதவீதம் அதிகரித்து 73,512-ஆக இருக்கிறது. முந்தைய ஆண்டின் இதே மாதத்தில் அது 60,262-ஆக இருந்தது. இதில் இரு சக்கர வாகனங்கள் ஏற்றுமதி 20 சதவீதம் உயர்ந்து (48,803-ல் இருந்து) 58,375-ஆக அதிகரித்துள்ளது. மூன்று சக்கர வாகனங்கள் ஏற்றுமதி 26 சதவீதம் அதிகரித்து 12,686-ஆக உள்ளது.

டொயோட்டா கிர்லோஸ்கர் மோட்டார் நிறுவனம் 7,769 கார்களை விற்பனை செய்துள்ளது. 2018 டிசம்பர் மாதத்தில் அது 12,489 கார்களாக இருந்தது. ஆக, விற்பனை 38 சதவீதம் குறைந்துள்ளது. உள்நாட்டில் அதன் விற்பனை 45 சதவீதம் குறைந்து (11,836 கார்களில் இருந்து) 6,544 கார்களாக குறைந்து இருக்கிறது. எனினும் ஏற்றுமதி 1,225 கார்களாக அதிகரித்து இருக்கிறது. முந்தைய ஆண்டின் இதே மாதத்தில் அது 653-ஆக இருந்தது. ஆக, ஏற்றுமதி 87 சதவீதம் உயர்ந்துள்ளது.

கடந்த 2019-ஆம் ஆண்டில் இந்நிறுவனத்தின் ஒட்டுமொத்த உள்நாட்டு விற்பனை 1,26,701 கார்களாக இருக்கிறது. முந்தைய ஆண்டுடன் ஒப்பிடும்போது இது 16 சதவீதம் குறைவாகும். அப்போது அது 1,51,480-ஆக இருந்தது.