வணிகம்

GOLD PRICE TODAY : அதிரடியாக உயர்ந்து ரூ.75,000-ஐ தாண்டிய தங்கம் விலை

நேற்று ஒரு சவரன் ரூ.74 ஆயிரத்து 280-க்கும் விற்பனை செய்யப்பட்டது.வெள்ளி விலை இன்று உயர்ந்துள்ளது.

மாலை மலர்

Published:23rd Jul, 2025 at 9:48 AM

சென்னை:

தங்கம் விலை தொடர்ந்து போக்கு காட்டி வருகிறது. விலை கிடுகிடுவென உயருவது, பின்னர் அவ்வப்போது குறைவதுமான நிலை இருக்கிறது. இதில் பெரும்பாலான நாட்களில் விலை ஏற்றத்தையே காண முடிகிறது.

அந்த வகையில் கடந்த மாதம் (ஜூன்) 2-வது வாரம் வரை விலை அதிகரித்து வந்து, பின்னர் குறையத் தொடங்கியது. இப்படியாக விலை குறைந்து வந்த தங்கம் விலை கடந்த ஒரு வாரத்துக்கு முன்பு ஏறத் தொடங்கியது. தொடர்ந்து விலையில் மீண்டும் ராக்கெட் வேகம் தெரிந்தது.

கடந்த வாரத்தில் சற்று வேகம் குறைந்த நிலையில், நேற்று ஒரே நாளில் எகிறி, மீண்டும் உயருவதற்கான அச்சாரத்தை போட்டு இருக்கிறது.

அதன்படி, நேற்று முன்தினம் ஒரு கிராம் ரூ.9 ஆயிரத்து 180-க்கும், ஒரு சவரன் ரூ.73 ஆயிரத்து 440-க்கும் விற்பனை ஆனது. நேற்றைய நிலவரப்படி, கிராமுக்கு ரூ.105-ம், சவரனுக்கு ரூ.840-ம் அதிகரித்து ஒரு கிராம் ரூ.9 ஆயிரத்து 285-க்கும், ஒரு சவரன் ரூ.74 ஆயிரத்து 280-க்கும் விற்பனை செய்யப்பட்டது. இதன் மூலம் தங்கம் விலை ஒரு மாதத்துக்கு பிறகு மீண்டும் ரூ.74 ஆயிரத்தை தாண்டியது.

இந்த நிலையில், இன்றும் தங்கம் விலை அதிரடியாக உயர்ந்துள்ளது. கிராமுக்கு 95 ரூபாய் உயர்ந்து ஒரு கிராம் 9,380 ரூபாய்க்கும் சவரனுக்கு 760 ரூபாய் உயர்ந்து ஒரு சவரன் 75,040 ரூபாய்க்கும் விற்பனையாகிறது.