புதுடெல்லி:
ஒலிம்பிக் ஹாக்கியில் 3-வது இடத்துக்கான ஆட்டத்தில் இந்திய அணி 2-1 என்ற கோல் கணக்கில் ஸ்பெயினை வீழ்த்தி மீண்டும் வெண்கலப்பதக்கத்தை கைப்பற்றியது.1972-ம் ஆண்டுக்கு பிறகு முதல்முறையாக இந்தியா தொடர்ச்சியாக 2-வது முறையாக பதக்கத்தை வென்றுள்ளது. இதன் மூலம் ஒலிம்பிக் வரலாற்றில் இந்திய ஹாக்கி அணி வென்ற பதக்க எண்ணிக்கை 13 ஆக உயர்ந்தது.
மீண்டும் வெண்கலப்பதக்கம் வென்ற ஹர்மன்பிரீத் சிங் தலைமையிலான இந்திய ஹாக்கி அணியினர் பாரீசில் இருந்து ஏர் இந்தியா விமானம் மூலம் நேற்று காலை நாடு திரும்பினர். வானில் பறக்கையில் விமானி தங்களது விமானத்தில் பதக்கம் வென்ற இந்திய ஹாக்கி அணியினர் மற்றும் அவரது குடும்பத்தினர் நம்முடன் பயணிப்பதாக மைக்கில் அறிவித்ததுடன், அவர்களுக்கு வாழ்த்தும் தெரிவித்தார். அப்போது சக பயணிகள் உற்சாகமாக கைதட்டி பாராட்டினர்.
நிறைவு விழாவில் தேசிய கொடியேந்தும் கோல் கீப்பர் ஸ்ரீஜேஷ் மற்றும் அமித் ரோஹிதாஸ், ராஜ்குமார் பால், சுக்ஜீத் சிங், சஞ்சய் ஆகியோர் தவிர அணியின் மற்ற வீரர்கள் அனைவரும் வந்தனர்.
டெல்லி விமான நிலையத்தில் இந்திய ஹாக்கி அணியினருக்கு மேள தாளம் முழங்க உற்சாகமான வரவேற்பு அளிக்கப்பட்டது. இந்திய ஹாக்கி சம்மேளன நிர்வாகிகள் மற்றும் நூற்றுக்கணக்கான ரசிகர்கள் திரண்டு வந்து மாலை மற்றும் சால்வை அணிவித்து வரவேற்றனர். அப்போது இசைக்கப்பட்ட இசைக்கு தகுந்தபடி வீரர்கள் நடனம் ஆடி மகிழ்ந்தனர்.