ஆஸ்திரேலியா வங்கதேசத்துக்கு இடையிலான 2வது டெஸ்டின் முதல் நாளில் 18 விக்கெட்டுகள் வீழ்ந்தன.
ஆஸ்திரேலியாவில் சுற்றுப்பயணம் மேற்கொண்டுள்ள நஜ்முல் ஹூசைன் ஷான்டோ தலைமையிலான வங்கதேச கிரிக்கெட் அணி 2 போட்டிகள் கொண்ட டெஸ்ட் தொடரில் ஆடுகிறது. இந்த டெஸ்ட் தொடர் உலக டெஸ்ட் சாம்பியன்ஷிப்புக்கு உட்பட்டது என்பதால் முக்கியத்துவம் பெறுகிறது.
டார்வினில் நடந்த முதல் டெஸ்டில் வங்கதேசம் அணி 9 விக்கெட் வித்தியாசத்தில் வெற்றி பெற்று தொடரில் 1-0 என முன்னிலை வகிக்கிறது.
இந்நிலையில், இரு அணிகளுக்கு இடையிலான 2வது டெஸ்ட் போட்டி இன்று தொடங்கியது. டாஸ் வென்ற ஆஸ்திரேலியா பவுலிங் தேர்வு செய்தது.
அதன்படி, முதலில் வங்கதேசம் அணி களமிறங்கியது. ஆஸ்திரேலிய அணியின் பந்துவீச்சாளர்கள் துல்லியமாகப் பந்து வீசினர்.
குறிப்பாக, மிட்செல் ஸ்டார்க் அனல்பறக்க வீசினார்.
21 ரன்கள் எடுப்பதற்குள் 6 விக்கெட்டுகளை இழந்து தத்தளித்தது. ஸ்டார்க் 5 விக்கெட்டுகளை வீழ்த்தினார்.
கடைசி விக்கெட்டுக்கு ஜோடி சேர்ந்த தைஜுல் இஸ்லாம், ஷோரிபுல் இஸ்லாம் ஜோடி 25 ரன் சேர்த்தது.
இறுதியில், வங்கதேசம் அணி முதல் இன்னிங்சில் 34 ஓவரில் 64 ரன்களுக்கு ஆல் அவுட்டானது.
ஆஸ்திரேலியா சார்பில் ஸ்டார்க் 6 விக்கெட்டும், பாட் கம்மின்ஸ் 3 விக்கெட்டும் வீழ்த்தினர்.
இதையடுத்து, ஆஸ்திரேலியா அணி முதல் இன்னிங்சில் களமிறங்கியது. அந்த அணியும் 41 ரன்னுக்குள் 3 விக்கெட்களை இழந்து தத்தளித்தது.
4வது விக்கெட்டுக்கு இணைந்த ஸ்டீவ் ஸ்மித்-கேமரூன் கிரீன் ஜோடி 77 ரன்கள் சேர்த்த நிலையில் ஸ்மித் 42 ரன்னில் அவுட்டானார். மற்ற வீரர்கள் நிலைத்து நிற்கவில்லை.
இறுதியில், முதல் நாள் முடிவில் ஆஸ்திரேலிய அணி முதல் இன்னிங்சில் 8 விக்கெட்டுக்கு 165 ரன்கள் எடுத்துள்ளது. கேமரூன் கிரீன் அரை சதம் கடந்து 51 ரன்னுடன் ஆட்டமிழக்காமல் உள்ளார்.
வங்கதேசம் சார்பில் ஷோரிபுல் இஸ்லாம் 6 விக்கெட் வீழ்த்தினார்.
2வது டெஸ்டின் முதல் நாளில் மொத்தம் 18 விக்கெட்டுகள் வீழ்ந்துள்ளது குறிப்பிடத்தக்கது.
