தென்கொரியாவில் வீடியோ கேம் நிறுவனரின் மனைவி, விவாகரத்து கோரி நீதிமன்றத்தில் வழக்கு தொடர்ந்திருந்த நிலையில், அவருக்கு விவாகரத்து உடன்படிக்கை தொகையாக ரூபாய் 18,000 கோடி வழங்கும்படி அந்நாட்டு நீதிமன்றம் உத்தரவிட்டுள்ளது.
தென்கொரியா நாட்டில் குவான் ஹியூக் பின் என்பவர் கடந்த 2002 ஆம் ஆண்டில் ஸ்மைல்கேட் என்ற கேமிங் நிறுவனத்தை தொடங்கினார்.
இந்த நிறுவனமானது நாளடைவில் பிரபலமடைந்து விரிவடைந்ததை தொடர்ந்து, அதன் சொத்து மதிப்பு ரூபாய் 60,000 கோடியாக உயர்ந்தது.
ஸ்மைல்கேட் நிறுவனரான குவோனுடன், அவரது மனைவி லீ என்பவருக்கு ஏற்பட்ட மனக்கசப்பை தொடர்ந்து, விவாகரத்து கோரி லீ நீதிமன்றத்தில் வழக்கு தொடர்ந்தார்.
மேலும் அவர் தனக்கும் ஸ்மைல்கேட் நிறுவனத்தில் பாதி பங்கு உள்ளதாக சியோல் நீதிமன்றத்தில் வாதாடினார்.
இந்த வழக்கு விசாரணைக்கு வந்தபோது, ஸ்மைல்கேட் நிறுவனரான குவோன் அவரது மனைவி லீ-க்கு, ரூபாய் 18,000 கோடி மதிப்புள்ள 35 சதவீத பங்குகளை வழங்குமாறு நீதிமன்றம் உத்தரவிட்டது.
மேலும் அவருக்கு ரொக்கமாக ரூபாய் 461 கோடி வழங்கும்படியும் நீதிமன்றம் உத்தரவிட்டது.
தென்கொரியாவில் முன்னதாக எஸ்.கே குழுமத்தின் நிறுவனரான சே என்பவரின் மனைவி ரோ, விவாகரத்து கோரி சியோல் நீதிமன்றத்தில் வழக்கு தொடர்ந்திருந்தார்.
அப்போது ரோ-வுக்கு விவாகரத்து உடன்படிக்கை தொகையாக ரூபாய் 17,000 கோடி வழங்கும்படி எஸ்.கே நிறுவனர் சே என்பவருக்கு நீதிமன்றம் உத்தரவிட்டது.
இதை எதிர்த்து சே, மேல்முறையீடு செய்தபோது, அந்த தொகையானது ரூபாய் 6,700 கோடியாக குறைக்கப்பட்டது.
இந்த நிலையில் தென்கொரியாவில் கடந்த ஆண்டுகளில் நீதிமன்றத்தால் விதிக்கப்பட்ட விவாகரத்து உடன்படிக்கை தொகையை விட, தற்போது ஸ்மைல்கேட் நிறுவனருக்கு விதிக்கப்பட்ட தொகையானது மிகப்பெரிய தொகையாக அமைந்துள்ளது.
