அமெரிக்க வெளியுறவுத்துறை மந்திரி இந்தியா வருகை

வாஷிங்டன்:

அமெரிக்க வெளியுறவுத்துறை மந்திரி ரெக்ஸ் டில்லர்சன் அடுத்த வாரம் இந்தியா, பாகிஸ்தான் உள்ளிட்ட நாடுகளுக்கு வருகை தரவுள்ளார்.

ஒருவார பயணமாக நாளை (21-ம் தேதி) வாஷிங்டன் நகரில் இருந்து புறப்படும் அமெரிக்க வெளியுறவுத்துறை மந்திரி ரெக்ஸ் டில்லர்சன், தனது அரசுமுறைப் பயணத்தின் முதல்கட்டமாக சவுதி அரேபியா நாட்டுக்கு செல்கிறார்.

ஈராக்-சவுதி அரேபியா நாடுகளுக்கு இடையிலான முதல் ஒருங்கிணைப்பு ஆலோசனை கூட்டத்தில் பங்கேற்கும் ரெக்ஸ் டில்லர்சன், ஏமன் உள்ளிட்ட வளைகுடா நாடுகளின் அரசியல் நிலவரம் தொடர்பாக சவுதி நாட்டு தலைவர்களுடன் ஆலோசனை நடத்துகிறார்.

பின்னர், கத்தார் தலைநகர் தோஹாவுக்கு செல்லும் அவர், ஈரான் - ஈராக் உள்ளிட்ட நாடுகளில் நிலவும் பிரச்சனைகள் தொடர்பாக ஆலோசனை நடத்துகிறார்.

பின்னர், பாகிஸ்தானுக்கு செல்லும் ரெக்ஸ் டில்லர்சன் இறுதியாக இந்தியா வருகிறார். அவர் இந்தியாவுக்கு வரும் தேதி இன்னும் இறுதி செய்யப்படவில்லை என அமெரிக்க வெள்ளை மாளிகை வட்டாரங்கள் தெரிவித்துள்ளன.