மும்பை:
ரிசர்வ் வங்கி, 2,000 ரூபாய் நோட்டுகள் வாபஸ் பெறப்படுவதாக கடந்த மே 19-ந் தேதி அறிவித்தது. அந்த நோட்டுகளை வங்கிக்கணக்கில் செலுத்தலாம் அல்லது வங்கியில் கொடுத்து வேறு மதிப்பு நோட்டுகளாக மாற்றிக்கொள்ளலாம் என்று கூறியது.
இப்படி மாற்றிக்கொள்ள செப்டம்பர் 30-ந் தேதிவரை கால அவகாசம் அளிக்கப்பட்டது. அந்த அவகாசம் முடிந்தவுடன், நாடு முழுவதும் உள்ள 19 ரிசர்வ் வங்கி அலுவலகங்களில் மாற்றிக்கொள்ளலாம் என்று ரிசர்வ் வங்கி அறிவித்தது.
இந்நிலையில், நேற்று முன்தினம் நிலவரப்படி, 97 சதவீத 2,000 ரூபாய் நோட்டுகள் வங்கிக்கு திரும்பி வந்து விட்டதாக ரிசர்வ் வங்கி கூறியுள்ளது. ரிசர்வ் வங்கி வெளியிட்ட அறிக்கையில் கூறப்பட்டு இருப்பதாவது:-
வாபஸ் அறிவிப்பு வெளியிடப்பட்ட மே 19-ந் தேதி, ரூ.3 லட்சத்து 56 ஆயிரம் கோடி மதிப்புள்ள 2,000 ரூபாய் நோட்டுகள் புழக்கத்தில் இருந்தன. அக்டோபர் 31-ந் தேதி நிலவரப்படி, ரூ.10 ஆயிரம் கோடி மதிப்புள்ள 2,000 ரூபாய் நோட்டுகள் மட்டுமே புழக்கத்தில் உள்ளன.
எனவே, 97 சதவீத 2,000 ரூபாய் நோட்டுகள் வங்கிக்கு திரும்பி வந்து விட்டன.
ரிசர்வ் வங்கி அலுவலகங்களில் 2,000 ரூபாய் நோட்டுகளை மாற்றிக்கொள்ளலாம். அங்கு நேரில் செல்ல முடியாதபட்சத்தில், இந்தியா போஸ்ட் தபால் நிலையங்கள் மூலம் நோட்டுகளை அனுப்பும் வசதியை பயன்படுத்திக் கொள்ளலாம்.
இவ்வாறு அதில் கூறப்பட்டுள்ளது.
