புதிதாக அமைக்கப்பட்ட 8-ஆவது மணிப்பூர் வக்பு வாரிய குழுவில் இரண்டு முஸ்லிம் அல்லாத உறுப்பினர்கள் சேர்க்கப்பட்டதை கண்டித்து, மணிப்பூர் முழுவதும் போராட்டம் தீவிரமடைந்தது. கடந்த மூன்று நாட்களாக சோரா, லிலோங் மற்றும் க்ஷேத்ரிகாவ் ஆகிய இடங்களில் பேரணிகள் நடைபெற்றன.
இந்த பேரணி, முதலமைச்சர் யும்னம் கேம்சந்த் சிங்கை மெய்தி பங்கல் சமூக பிரதிநிதிகளை சந்தித்து, வக்பு வாரியத்தின் அமைப்பு குறித்த அவர்களின் கவலைகளுக்கு முன்னுரிமை அடிப்படையில் தீர்வு காணப்படும் என்று உறுதியளிக்க வலியுறுத்தி நடத்தப்பட்டது.
மணிப்பூரின் 8-ஆவது வக்பு வாரியத்தில் முஸ்லிம் அல்லாத உறுப்பினர்களை சேர்ப்பதற்கு எதிரான கூட்டு குழு (JCAINMM-WB), முஸ்லிம் அமைப்புகள், உள்ளூர் மன்றங்கள் மற்றும் சிவில் சமூக குழுக்களுடன் இணைந்து சமீபத்திய போராட்டங்களை முன்னெடுத்துள்ளது. மாநிலம் தழுவிய பிரச்சாரத்தின் ஒரு பகுதியாக, முதல் பேரணி ஆகஸ்ட் 20 அன்று காக்சிங் மாவட்டத்தின் சோராவில் நடைபெற்றது.
கூட்டுக் குழு, அஞ்சுமன் நஸ்ருல் இஸ்லாம் சோரா, அனைத்து சோரா கிளப்களின் ஒருங்கிணைப்பு குழு, சோரா, பூண்ட்ரே மற்றும் கீராக் ஆகிய ஜமியத்துல் உலமா கிளைகள் மற்றும் கீராக் மக்கா சமூக நலக் கழகம் ஆகியவை இணைந்து இந்தப் பேரணியை ஏற்பாடு செய்தன.
முஸ்லிம் அல்லாத இரு உறுப்பினர்களை சேர்த்ததற்கு எதிர்ப்பு தெரிவித்து, பதாகைகளை ஏந்தியும் முழக்கங்களை எழுப்பியும் பெருந்திரளான மக்கள் அந்த ஆர்ப்பாட்டத்தில் பங்கேற்றனர்.
கூட்டத்தில் உரையாற்றிய ஜமியத்-உல்-உலமா சோரா கிளை தலைவர் எம்.எல். சுல்பிகார் ஆலம் ஷேக், வக்பு வாரியத்தை முஸ்லிம் சமூகத்திற்கு ஒரு முக்கியமான நிறுவனம் என்று விவரித்ததோடு, முஸ்லிம் அல்லாத இரு உறுப்பினர்களை சேர்க்கும் முடிவை ரத்து செய்ய வேண்டும் என்றும் கோரிக்கை விடுத்தார்.
கோரிக்கைக்கு அரசு செவிசாய்க்க தவறினால், மாநிலம் முழுவதும் போராட்டம் தீவிரப்படுத்தப்படும் என்றும் அவர் எச்சரித்தார். மேலும், மக்கள் தொகை கணக்கெடுப்பிற்கு முன்பு தேசிய குடிமக்கள் பதிவேட்டை (NRC) புதுப்பிப்பதற்கும் ஷேக் ஆதரவு தெரிவித்தார்.
கூட்டுக் குழுவின் தலைவர் எம்.வி. அத்தாவுர் ரஹ்மான், முஸ்லிம் அல்லாத இரு உறுப்பினர்களை நீக்கிவிட்டு, அவர்களுக்குப் பதிலாக முஸ்லிம் உறுப்பினர்களை நியமிக்க வேண்டும் என்றும் கோரிக்கை விடுத்தார்.
