கன்னடம், தமிழ், தெலுங்கு மற்றும் பல மொழிகளில் தனது நடிப்பால் ரசிகர்களின் மனதை வென்ற மூத்த நடிகையும், பத்மஸ்ரீ விருது பெற்றவருமான 'சௌகார் ஜானகி' மறைவுக்கு கர்நாடக முதலமைச்சர் டி.கே. சிவகுமார் இரங்கல் தெரிவித்தார்.
தனது இரங்கல் செய்தியில், சிவகுமார் கூறுகையில், நடிகை சௌகார் ஜானகியின் மறைவு செய்தி மிகுந்த வருத்தமளிப்பதாக குறிப்பிட்டார்.
"'சௌகார் ஜானகி' கலை ஆர்வலர்களின் இதயங்களில் என்றும் நிலைத்திருப்பார். 400-க்கும் மேற்பட்ட திரைப்படங்கள் மற்றும் 300-க்கும் மேற்பட்ட நாடகங்களில் அவர் ஆற்றிய பங்களிப்பு எப்போதும் நினைவுகூரப்படும்," என்று அவர் கூறினார்.
இந்திய திரையுலகின் மிகவும் மதிக்கப்படும் மூத்த கலைஞர்களில் ஒருவரான ஜானகி, வயது முதிர்வு தொடர்பான உடல்நலக்குறைவு காரணமாக வெள்ளிக்கிழமை காலமானார். அவருக்கு வயது 94. அவர் பிற்பகல் 1.59 மணிக்கு உயிர் பிரிந்தார்.
அவரது மறைவால் இந்தியத் திரையுலகின் ஒரு முக்கிய இணைப்பு துண்டிக்கப்பட்டுள்ளது என்று சிவகுமார் கூறினார். மறைந்த அவரது ஆன்மாவுக்கு இறைவன் நித்திய அமைதியை அருளவும், இந்த இழப்பைத் தாங்கிக்கொள்ளும் வலிமையை அவரது குடும்பத்தினருக்கும் நெருங்கியவர்களுக்கும் வழங்கவும் அவர் பிரார்த்தனை செய்வதாக தெரிவித்தார்.
கடந்த சில நாட்களுக்கு முன்பு உடல்நலக்குறைவு ஏற்பட்டதை தொடர்ந்து, சென்னை ஆழ்வார்ப்பேட்டையில் உள்ள தனியார் மருத்துவமனையில் அனுமதிக்கப்பட்ட சௌகார் ஜானகிக்கு தீவிர சிகிச்சை அளிக்கப்பட்டது.
அவருக்கு வென்டிலேட்டர் உதவியுடன் சிகிச்சை வழங்கப்பட்ட நிலையில் அவரது உடல்நிலை மோசமடைந்ததை தொடர்ந்து, டாக்டர்கள் குழு தீவிர சிகிச்சை அளித்து வந்தனர்.
இந்நிலையில் சிகிச்சை பலனின்றி நடிகை சௌகார் ஜானகி காலமானார். இவரது மறைவுக்கு திரைப்பிரபலங்கள், ரசிகர்கள் மற்றும் பொதுமக்கள் இரங்கல் தெரிவித்து வருகின்றனர்.
