14 ஏ.சி.கள், 5 LED டிவிகள்,.. முதல்வர் ரேகா குப்தா இல்லத்தை புதுப்பிக்க ரூ.60 லட்சம் டெண்டர் - ஆம் ஆத்மி தாக்கு

டெல்லி முதல்வர் ரேகா குப்தாவின் அதிகாரப்பூர்வ இல்லத்தை ரூ. 60 லட்சம் செலவில் புதுப்பிக்க பொதுப்பணித் துறை டெண்டர் வெளியிட்டுள்ளது. இந்த புதுப்பித்தலில் ஏர் கண்டிஷனர்கள், தொலைக்காட்சிகள் மற்றும் பல்வேறு மின்னணு மற்றும் அலங்காரப் பொருட்கள் அடங்கும். இந்த இல்லம் சிவில் லைன்ஸ் பகுதியில் உள்ள ராஜ் நிவாஸ் மார்க்கில் அமைந்துள்ளது.

முன்னாள் முதல்வர் அரவிந்த் கெஜ்ரிவாலின் இல்லம் 'ஷீஷ்மஹால்' என்று பாஜகவால் விமர்சிக்கப்பட்டு வந்த நிலையில், தற்போது ரேகா குப்தாவின் இல்லப் புதுப்பித்தல் டெண்டர் வெளியாகியுள்ளது.

ஆம் ஆத்மி கட்சி, ரேகா குப்தாவின் இல்லம் 'மாயாமஹால்' ஆக மாறுகிறது என்று விமர்சித்துள்ளது. மற்றவர்கள் 'ஷீஷ்மஹால்' கட்டியதாகக் குற்றம் சாட்டிவிட்டு, தாங்கள் 'ரங்மஹால்' கட்டுவதாகக் காங்கிரஸ் விமர்சித்துள்ளது.

டெண்டரின்படி, இந்த இல்லத்தில் 14 ஏர் கண்டிஷனர்கள், ஐந்து 4K அல்ட்ரா HD LED ஸ்மார்ட் டிவி செட்கள் (நான்கு 55 இன்ச் மற்றும் ஒரு 65 இன்ச்), 10 flood விளக்குகள், சரவிளக்குகள்(chandeliers) , சுவர் விளக்குகள் மற்றும் ஒரு மின்சாரப் புகைபோக்கி ஆகியவை பொருத்தப்படும்.

மேலும், 14 சிசிடிவி கேமராக்கள், ஒரு தடையில்லா மின்சாரம் (UPS) அமைப்பு, 23 ரிமோட் கண்ட்ரோல் சீலிங் ஃபேன்கள், 16 சுவர் ஃபேன்கள் மற்றும் ஆறு கீசர்கள் ஆகியவை இடம்பெறும். ஒரு வாஷிங் மெஷின், பாத்திரம் கழுவும் இயந்திரம் மற்றும் ஒரு பெரிய RO தண்ணீர் சுத்திகரிப்பு அமைப்பு ஆகியவையும் புதுப்பித்தலின் ஒரு பகுதியாகும்.

மொத்தம் 115 விளக்கு சாதனங்கள், சுவர் விளக்குகள், தொங்கும் விளக்குகள் மற்றும் மூன்று பெரிய சரவிளக்குகள் பொருத்தப்படும். சமையலறையில் ஒரு மின்சாரப் புகைபோக்கி, மின்காந்த பர்னர்கள் கொண்ட கேஸ் அடுப்பு, 20 லிட்டர் மைக்ரோவேவ் மற்றும் ஒரு தண்ணீர் சுத்திகரிப்பான் ஆகியவை சேர்க்கப்படும்.

முதல்வரின் குடும்பம் வசிக்க இந்த விரிவான புதுப்பித்தல்கள் மற்றும் மேம்பாடுகள் தேவை என்று ஒரு பொதுப்பணித்துறை அதிகாரி தெரிவித்தார்.