தலா 60 தொகுதிகள் கொண்ட திரிபுரா, மேகாலயா மற்றும் நாகலாந்து ஆகிய மாநிலங்களில் நடைபெற்ற சட்டமன்றத் தேர்தலில் பதிவான வாக்குகள் இன்று எண்ணப்பட்டு வருகின்றன. இந்த மாநிலங்களில் ஆட்சியமைக்க 31 உறுப்பினர்களின் ஆதரவு தேவை.
திரிபுராவில் ஆளும் இடதுசாரி கூட்டணி அதிக இடங்களில் முன்னிலையில் உள்ளது. அடுத்த இடத்தில் பா.ஜ.க. நெருங்கி வருகிறது. 10 மணி நிலவரப்படி இடதுசாரி கூட்டணி 31 தொகுதிகளிலும், பா.ஜ.க. கூட்டணி 27 தொகுதிகளிலும் முன்னிலை பெற்றிருந்தது.
மேகாலயாவைப் பொருத்தவரை ஆளும் காங்கிரஸ் கட்சி துவக்கத்தில் இருந்தே அதிக இடங்களில் முன்னிலையில் உள்ளது. 10 மணி நிலவரப்படி காங்கிரஸ் 21 தொகுதிகளிலும், தேசிய மக்கள் கட்சி 11 தொகுதிகளிலும் முன்னிலையில் இருந்தது. பா.ஜ.க. 6 தொகுதிகளிலும், பிற கட்சிகள் 14 தொகுதிகளிலும் முன்னிலையில் இருந்தன.
நாகாலாந்து மாநிலத்தைப் பொருத்தவரை, துவக்கத்தில் என்.டி.பி.பி., பா.ஜ.க. கூட்டணி அதிக இடங்களில் முன்னிலை பெற்றது. அதன்பின்னர் நாகா மக்கள் முன்னணி கூட்டணி பா.ஜ.க. கூட்டணியை முந்தியது. 10 மணி நிலவரப்படி நாகா மக்கள் முன்னணி கூட்டணி 29 தொகுதிகளிலும், பா.ஜ.க. கூட்டணி 26 தொகுதிகளிலும் முன்னிலையில் இருந்தன.