மஹிந்திரா அல்டுராஸ் ஜி4 விநியோகம் துவக்கம் - முதல் மாடல் ஜனாதிபதிக்கு வழங்கப்பட்டது

மஹிந்திரா ஆட்டோ நிறுவனத்தின் அல்டுராஸ் ஜி4 பிஎஸ்6 எஸ்யுவி இந்திய ஜனாதிபதிக்கு வழங்கப்பட்டது. புதிய கார் விநியோகம் ஜனாதிபதி மாளிகைக்கு கொண்டு செல்லப்பட்டு அதன் சாவி இணை செயலாளரிடம் கொடுக்கப்பட்டது.

புதிய கார் விநியோக விவரங்களை மஹிந்திரா குழுமத்தின் மொபிலிட்டி சர்வீசஸ் பிரிவு தலைவர் பார்த்தசாரதி உறுதிப்படுத்தினார். ஜனாதிபதிக்கு வழங்கப்பட்ட மாடலில் ஏதேனும் மாற்றங்கள் செய்யப்பட்டுள்ளதா என்பது குறித்து மஹிந்திரா சார்பில் எந்த தகவலும் வழங்கப்படவில்லை.

தற்சமயம் இந்தியா ஜனாதிபதி ராம்நாத் கோவிந்த் மெர்சிடிஸ் பென்ஸ் எஸ் கிளாஸ் எஸ்600 புல்மேன் கார்டு மாடலை தனது அதிகாரப்பூர்வ வாகனமாக பயன்படுத்தி வருகிறார். புதிய அல்டுராஸ் ஜி4 மெர்சிடிஸ் பென்ஸ் மாடலுக்கு மாற்றாக பயன்படுத்தப்படாது.

மேம்பட்ட அல்டுராஸ் ஜி4 மாடல் இந்த ஆண்டு துவக்கத்தில் இந்திய சந்தையில் அறிமுகம் செய்யப்பட்டது. புதிய அல்டுராஸ் ஜி4 பிஎஸ்6 மாடல் விலை ரூ. 28.69 லட்சத்தில் துவங்குகிறது. இதன் டாப் எண்ட் மாடல் விலை ரூ. 31.69 லட்சம் என நிர்ணயம் செய்யப்பட்டு உள்ளது. அனைத்து விலைகளும் எக்ஸ் ஷோரூம் அடிப்படையில் குறிப்பிடப்பட்டு உள்ளது.