கராகஸ்:
தென் ஆப்பிரிக்க நாடான வெனிசுலாவில் கடும் பொருளாதார நெருக்கடி ஏற்பட்டுள்ளது.
எனவே, அதிபர் நிகோலஸ் மதுரோ பதவி விலக எதிர்க்கட்சிகள் வலியுறுத்தி போராட்டம் நடத்தி வருகின்றன. போராட்டத்தில் ஈடுபட்ட 100-க்கும் மேற்பட்டோர் உயிரிழந்துள்ளனர்.
இந்த நிலையில் 1999-ம் ஆண்டு உருவாக்கப்பட்ட அரசியல் சட்டத்தை திருத்த போவதாக மதுரோ அறிவித்தார். அதற்காக வருகிற 30-ந் தேதி பாராளுமன்ற தேர்தலை அறிவித்துள்ளார்.
இதற்கு எதிர்ப்பு தெரிவித்து எதிர்க்கட்சிகள் நாடு முழுவதும் பொது வாக்கெடுப்பு நடத்தின. வெளிநாடுகளில் வாழும் வெனிசுலா மக்கள் வாக்களிக்க வசதியாக வாக்கு சாவடிகளும் அமைக்கப்பட்டன. மொத்தம் 2 ஆயிரம் வாக்குசாவடிகளில் ஏராளமான பொதுமக்கள் வரிசையில் நின்று வாக்களித்தனர்.
மொத்தம் 71 லட்சத்து 86 ஆயிரத்து 170 பேர் அதிபர் மதுரோவுக்கு எதிராக வாக்களித்துள்ளதாக அதிகாரப்பூர்வமாக அறிவிக்கப்பட்டுள்ளது. கடந்த 2013-ம் ஆண்டு மதுரோ அதிபரான போது அவருக்கு 70 லட்சத்து 50 ஆயிரம் வாக்குகளும், 2015-ம் ஆண்டு நடந்த தேர்தலில் 70 லட்சத்து 70 ஆயிரம் வாக்குகளும் கிடைத்தன. தற்போது அவருக்கு எதிராக 71 லட்சத்துக்கும் அதிகமான வாக்குகள் கிடைத்துள்ளது குறிப்பிடத்தக்கது.