திண்டுக்கல்லில் கல்லூரி மாணவர்கள் தரையில் அமர்ந்து தர்ணா போராட்டம்

திண்டுக்கல்:

தமிழகத்தில் கொரோனா ஊரடங்கு தளர்வுகள் அறிவிக்கப்பட்ட நிலையில் கடந்த மாதம் முதல் மேல்நிலை பள்ளிகள் மற்றும் கல்லூரிகள் திறக்கப்பட்டன. சுழற்சி முறையில் மாணவ-மாணவிகளை வரவழைத்து பாடம் கற்பிக்கவேண்டும் என அறிவுறுத்தி உள்ள தமிழக அரசு விருப்பம் இல்லாத மாணவர்களை கட்டாயப்படுத்த கூடாது என தெரிவித்துள்ளது.

மேலும் கல்வி கட்டணங்களை வசூலிப்பதில் கெடுபிடி காட்டக்கூடாது என்றும் தெரிவித்துள்ளது. இந்நிலையில் திண்டுக்கல்-கரூர் சாலையில் உள்ள தனியார் என்ஜினீயரிங் கல்லூரி மாணவ-மாணவிகள் இன்று வகுப்புகளை புறக்கணித்து கல்லூரி வாசல் முன்பாக தரையில் அமர்ந்து தர்ணா போராட்டத்தில் ஈடுபட்டனர். தங்களிடம் கல்வி கட்டணத்தை நிர்வாகம் முழுமையாக கேட்பதாகவும், இதுகுறித்து அரசு நடவடிக்கை எடுக்கவேண்டும் எனவும் தெரிவித்தனர். இதனால் கல்லூரி முன்பு திடீர் பரபரப்பு ஏற்பட்டது.