நீட் தேர்வினால் மட்டுமே மருத்துவப்படிப்பில் அரசு பள்ளி மாணவர்கள் அதிக எண்ணிக்கையில் இடம்பெற முடிந்தது- பாஜக

சென்னை:

தமிழக பா.ஜ.க. செய்தி தொடர்பாளர் தி.நாராயணன் வெளியிட்டுள்ள அறிக்கையில் கூறியிருப்பதாவது:-

நீட் தேர்வினால் ஒரேஆண்டில் 313 தமிழக அரசு பள்ளி மாணவ -மாணவிகள் சேர்ந்துள்ளநிலையில், நீட் தேர்வு நடத்துவதற்கு முன்பு நூற்றுக்கணக்கான அரசு பள்ளி மாணவ-மாணவிகள் மருத்துவக்கல்லூரிகளில் சேர்ந்தது போன்ற ஒரு தோற்றத்தை தமிழக அரசியல்கட்சிகள் ஏற்படுத்த முயல்வது வன்மையாக கண்டிக்கத்தக்கது.

நீட் தேர்வினால் மட்டுமே கடந்த 10 ஆண்டுகளில் அனுமதிக்கப்பட்ட அரசு பள்ளி மாணவ- மாணவிகளின் எண்ணிக்கை ஒரேஆண்டில் எட்டப்பட்டுள்ளது என்பதை யாராலும் மறுக்கவோ, மறைக்கவோ முடியாது. தனியார் பள்ளிகளின் ஆக்கிரமிப்பால் அலட்சியமான கல்வித்திட்ட அமைப்பால் இதுநாள் வரை தகுதியிருந்தும் மருத்துவக்கல்லூரிகளில் அனுமதிபெறமுடியாத அரசு பள்ளி மாணவ-மாணவிகள் தற்போது 10 மடங்கு அதிகமாக மருத்துவப்படிப்புகளில் நுழைந்துள்ளது நீட் தேர்வினால் மட்டுமே என்ற இனிப்பான உண்மை சிலருக்கு கசக்கத்தான் செய்யும்.

நீட் தேர்வினால் மட்டுமே அரசு பள்ளி மாணவ-மாணவிகள் அதிக எண்ணிக்கையில் இடம்பெற முடிந்தது என்ற உண்மையை மக்கள் இனி உணருவார்கள். அதை உணரும்போது பா.ஜ.க.வின் நிலைப்பாட்டை வரவேற்பார்கள். அந்த உண்மை நீட் தேர்வை எதிர்த்தவர்களுக்கு ஏமாற்றத்தை, தோல்வியை தரும்.

இவ்வாறு அதில் அவர் கூறியுள்ளார்.