ஸ்ரீநகர்:
ஜம்மு காஷ்மீர் மாநிலத்தில் உள்ள புனித ஸ்தலமான அமர்நாத்தில் இருக்கும் பனி லிங்கத்தை 21 நாட்களில் இதுவரை 2.23 லட்சம் யாத்ரீகர்கள் தரிசித்துள்ளனர்.
ஜம்மு - காஷ்மீர் மாநிலம் அமர்நாத் குகைக் கோயிலில் ஆண்டுதோறும் தோன்றும் பனி லிங்கத்தை தரிசிக்க ஜம்மு வழியாக யாத்ரீகர்கள் பயணம் செய்வார்கள். இந்த ஆண்டு தரிசனத்தையொட்டி யாத்ரீகர்களின் முதல் குழுவினர் கடந்த 28-ம் தேதி பயணத்தை தொடங்கினர். முதல் நாளாக 2,280 யாத்ரீகர்கள் மலையடிவாரத்தில் இருந்து அமர்நாத் ஆலயத்துக்கு புறப்பட்டு சென்றனர்.
யாத்திரையின் 12-வது நாளின் போது அனந்தநாக் மாவட்டத்தின் வழியாக வந்த யாத்ரீகர்களின் பேருந்து மீது தீவிரவாதிகள் தாக்குதல் நடத்தியதில் 7 பேர் பலியாகினர். 20-க்கும் மேற்பட்டவர்கள் படுகாயங்களுடன் மருத்துவமனையில் சிகிச்சைக்காக அனுமதிக்கப்பட்டுள்ளனர்.
தீவிரவாதிகளின் தாக்குதலுக்கு பின்னர் எந்த பிரச்சனையும் இல்லாமல் யாத்திரை சென்று வருகின்றனர். 21-வது நாளான இன்று 6064 பேர் தரிசனம் செய்துள்ளனர். இதுவரை, மொத்தம் 2,22,619 யாத்ரீகர்கள் பனி லிங்கத்தை தரிசனம் செய்துள்ளதாக ஆலய நிர்வாகம் தெரிவித்துள்ளது.