திருவண்ணாமலை அருணாசலேஸ்வரர் கோவில் மிகவும் பிரசித்தி பெற்ற கோவிலாகும். இந்த கோவிலில் கார்த்திகை தீபத் திருவிழா மிகவும் சிறப்பாக நடைபெறும். இந்த ஆண்டுக்கான கார்த்திகை தீபத் திருவிழா வருகிற நவம்பர் மாதம் 20-ந் தேதி துர்க்கை அம்மன் உற்சவத்துடன் தொடங்கி டிசம்பர் மாதம் 6-ந் தேதி வரை 17 நாட்கள் நடைபெற உள்ளது.
இதில் முக்கிய திருவிழாவாக 10 நாட்கள் நடைபெறும் பிரம்மோற்சவத்தில் முதல் நாள் விழா நவம்பர் மாதம் 23-ந் தேதி கொடியேற்றத்துடன் தொடங்கி டிசம்பர் மாதம் 2-ந் தேதியன் று 10-ம் நாள் மகா தீப தரிசனத்துடன் நடைபெற உள்ளது.
டிசம்பர் மாதம் 3-ந் தேதி முதல் 5-ந் தேதி வரை 3 நாட்கள் அய்யங்குள தீர்த்த குளத்தில் தெப்பல் உற்சவம் நடைபெறும். 6-ந் தேதி சண்டிகேஸ்வரர் உற்சவத்துடன் 17 நாட்கள் விழா நிறைவு பெறுகிறது. மேலும் இந்த ஆண்டு மகா தீபத்திருவிழா நடைபெறும் நாளான டிசம்பர் 2-ந் தேதி அன்று இரவு 12.12 மணிக்கு பவுர்ணமி தொடங்குகிறது என்பது குறிப்பிடத்தக்கது.
தீபத் திருவிழாவுக்கான பந்தக்கால் முகூர்த்தம் நிகழ்ச்சி வருகிற 1-ந் தேதி (ஞாயிற்றுக்கிழமை) நடைபெற உள்ளது. அன்று காலை 7.30 மணிக்கு மேல் 9 மணிக்குள் பந்தக்கால் நடும் நிகழ்ச்சி நடைபெறும். அப்போது சம்மந்த விநாயகர் சன்னதியில் சிறப்பு அபிஷேக, ஆராதனையும் நடைபெற உள்ளது.
இதற்கான ஏற்பாடுகளை கோவில் இணை ஆணையர் ரா.ஜெகன்நாதன் மற்றும் விழா குழுவினர், கோவில் அலுவலர்கள் செய்து வருகின்றனர்.