திருவனந்தபுரம்:
கேரளாவில் இந்த ஆண்டு தென்மேற்கு பருவமழை தீவிரமாக பெய்து வருகிறது. இதனால் அங்குள்ள நீர் நிலைகள் வேகமாக நிரம்பி வருகிறது. மேலும் கேரள மாநிலம் எங்கும் மீண்டும் பசுமை தழைக்க தொடங்கி விட்டது.
இதை தொடர்ந்து கேரளாவுக்கு சுற்றுலா பயணிகள் தற்போது அதிகளவு வருகை தர தொடங்கிவிட்டனர். அங்குள்ள அருவிகள், ஆறுகள், கடற்கரை என்று சுற்றுலா தலங்களில் உள்நாட்டு, வெளிநாட்டு சுற்றுலா பயணிகள் கூட்டம் அதிகமாக காணப்படுகிறது.
இந்த நிலையில் சேலம் மாவட்டம் சங்ககிரியை சேர்ந்த ஒரு என்ஜினீயரிங் கல்லூரி மாணவர்கள் 30 பேர் மற்றும் பேராசிரியர்கள் திருவனந்தபுரம் அருகே உள்ள காஞ்சிரம்குளம் பகுதியில் உள்ள இயற்கை எழில் சூழ்ந்த பகுதிக்கு சுற்றுலா சென்றனர்.
இந்த இடம் ஆறும், கடலும் சங்கமிக்கும் பகுதியாகும். தற்போது இந்த ஆற்றில் அதிகளவு தண்ணீர் செல்கிறது. இந்த ஆற்றில் மாணவர்கள் இறங்கி ஆனந்த குளியலிட்டனர்.
அப்போது சங்ககிரியை சேர்ந்த கவுதம் (வயது 20) என்ற மாணவர் ஆற்றில் ஆழமான பகுதிக்கு சென்றதால் அவர் எதிர்பாராதவிதமாக தண்ணீரில் மூழ்கினார். இதை பார்த்த மற்ற மாணவர்கள் கூச்சல் போட்டனர். அந்த பகுதியில் மீன்பிடித்துக்கொண்டிருந்த மீனவர்கள் சிலர் அந்த மாணவரை காப்பாற்ற முயன்றனர். ஆனால் அதற்குள் மாணவர் கவுதம் ஆற்றில் மூழ்கிவிட்டார்.
இதுபற்றி போலீசாருக்கும், கடலோர காவல்படையினருக்கும் தகவல் கொடுக்கப்பட்டது. அவர்கள் ஆற்றில் மூழ்கிய மாணவர் கவுதமை தேடும் பணியில் ஈடுபட்டுள்ளனர்.
சுற்றுலா வந்த இடத்தில் மாணவர் கவுதம் ஆற்றில் மூழ்கியதால் அவரது நண்பர்கள் சோகத்தில் ஆழ்ந்தனர். இதுபற்றி அவரது பெற்றோருக்கும் தகவல் கொடுக்கப்பட்டு உள்ளது.
