உ.பி.: சாலை விபத்துகளில் 9 பேர் பலி

லக்னோ:

உத்தரப்பிரதேசம் மாநிலம் லக்னோவில் உள்ள இந்திரா நகரை சேர்ந்த ஒரு குடும்பத்தினர் அருகிலுள்ள கோயிலுக்கு செல்வதற்காக இன்று காலை காரில் சென்று கொண்டிருந்தனர். லக்னோ - ரேபரேலி தேசிய நெடுஞ்சாலையில் சென்று கொண்டிருந்தபோது கார் திடீரென கட்டுப்பாட்டை இழந்தது.

இதையடுத்து கார் சாலை தடுப்பை மீறி எதிரில் வந்த லாரி மீது வேகமாக மோதியது. இந்த விபத்தில் ஒரே குடும்பத்தை சேர்ந்த 5 பேர் உள்பட 6 பேர் சம்பவ இடத்திலேயே பரிதாபமாக பலியாகினர்.

இதேபோல், உத்தரப்பிரதேசம் மாநிலம் முசாபர்நகரில் நேற்று இரவு மீரட் - கர்னால் நெடுஞ்சாலையில் பைக்கில் சென்ற குடும்பத்தினர் மீது டிராக்டர் மோதியது. இந்த விபத்தில் பைக்கில் சென்ற கணவன், மனைவி மற்றும் அவர்களது மகள் ஆகியோர் உயிரிழந்தனர்.

சாலை விபத்துக்கள் தொடர்பாக போலீசார் வழக்குப்பதிவு செய்து விசாரணை நடத்தி வருகின்றனர்.