நெல்லை:
பாளையை அடுத்த கீழநத்தத்தை சேர்ந்தவர் கந்தன். இவரது மனைவி ராசம்மாள்(வயது80). இவரது மகள் வீடு தாழையூத்து அருகே வண்ணான்பச்சேரியில் உள்ளது. அங்கு இவர் தினமும் செல்வார். அப்போது அவர் தாமிரபரணி ஆற்றில் இடுப்பளவு தண்ணீர் வரும் பகுதி வழியாக கடந்து செல்வது வழக்கம்.
கடந்த 18 ந் தேதி மகள் வீட்டுக்கு செல்வதற்கு வீட்டில் இருந்து ராஜம்மாள் புறப்பட்டார். ஆனால் அவர் மகள் வீட்டுக்கு செல்லவில்லை. தனது வீட்டுக்கும் திரும்பி வரவில்லை. இதனால் ராசம்மாளை அவரது குடும்பத்தினர் தேடி வந்தனர். இந்த நிலையில் செப்பறை கோவில் அருகே ஆற்றில் ராசம்மாள் இறந்து கிடப்பதாக போலீசாருக்கு தகவல் கிடைத்தது. போலீசார் அங்கு சென்று ராசம்மாள் உடலை மீட்டனர். அவரது உடல் அழுகிய நிலையில் காணப்பட்டது. ஆற்றைக் கடந்து வந்த போது அவர் தண்ணீரில் மூழ்கி இறந்தது போலீசார் விசாரணையில் தெரியவந்தது.
இதுபற்றி போலீசார் வழக்கு பதிந்து விசாரணை நடத்தி வருகிறார்கள்.
