ஹூண்டாய் நிறுவனம் தனது கார் மாடல்களுக்கு அசத்தல் சலுகை மற்றும் தள்ளுபடி உள்ளிட்ட பலன்களை அறிவித்து இருக்கிறது. அந்த வகையில் ஹூண்டாய் கார் வாங்குவோருக்கு அதிகபட்சம் ரூ. 1.5 லட்சம் வரையிலான தள்ளுபடி வழங்கப்படுகிறது. இவை தள்ளுபடி, எக்சேன்ஜ் சலுகை மற்றும் கார்ப்பரேட் பலன்கள் வடிவில் வழங்கப்படுகிறது.
அதன்படி ஹூண்டாய் ஆரா மாடலுக்கு அதிகபட்சம் ரூ. 33 ஆயிரம் வரையிலான பலன்கள் வழங்கப்படுகிறது. ஆரா CNG மாடல்களுக்கு ரூ. 33 ஆயிரமும், பெட்ரோல் வேரியண்ட்களுக்கு ரூ. 23 ஆயிரம் வரையிலான பலன்களும் வழங்கப்படுகின்றன. அதன்படி இந்திய சந்தையில் இதன் விலை ரூ. 6 லட்சத்து 44 ஆயிரம் என துவங்குகிறது. இதன் டாப் எண்ட் மாடல் விலை ரூ. 9 லட்சம் என்று நிர்ணயம் செய்யப்பட்டு உள்ளது.
ஹூண்டாய் அல்கசார் மாடலுக்கு ரூ. 35 ஆயிரம் வரையிலான பலன்கள் வழங்கப்படுகின்றன. இதன் டீசல் வேரியண்ட்களுக்கு ரூ. 20 ஆயிரம் வரையிலான பலன்கள் வழங்கப்படுகின்றன. இந்த கார் 1.5 லிட்டர் டர்போ பெட்ரோல் என்ஜின் மற்றும் 1.5 லிட்டர் டீசல் என்ஜின் என இருவித ஆப்ஷன்களில் கிடைக்கிறது. இதன் விலை ரூ. 16 லட்சத்து 77 ஆயிரம் என துவங்கி அதிகபட்சம் ரூ. 21 லட்சத்து 13 ஆயிரம் என்று நிர்ணயம் செய்யப்பட்டு உள்ளது.
ஹூண்டாய் வெர்னா மாடலுக்கு ரூ. 45 ஆயிரம் வரையிலான பலன்கள் வழங்கப்படுகின்றன. கிராண்ட் i10 நியோஸ் மாடலுக்கு ரூ. 48 ஆயிரமும், ஹூண்டாய் i20 மாடலுக்கு ரூ. 20 ஆயிரம் வரையிலான பலன்கள் வழங்கப்படுகின்றன. ஹூண்டாய் டக்சன் மாடலுக்கு ரூ. 1 லட்சத்து 50 ஆயிரம் வரையிலான பலன்கள் வழங்கப்படுகின்றன. எனினும், இது டீசல் வேரியண்ட்களுக்கு மட்டுமே பொருந்தும்.
