இங்கிலாந்து - தென்ஆப்பிரிக்கா அணிகளுக்கு இடையிலான நான்கு போட்டிகள் கொண்ட டெஸ்ட் தொடர் நேற்றுடன் முடிவடைந்தது. இதில் இங்கிலாந்து 3-1 எனத் தொடரை வென்றது. அதேபோல் இந்தியா - இலங்கை அணிகளுக்கு இடையிலான மூன்று போட்டிகள் கொண்ட டெஸ்ட் தொடர் நடைபெற்று வருகிறது.
காலே மற்றும் கொழும்பில் நடைபெற்ற டெஸ்ட் போட்டிகளில் இந்தியா வெற்றி பெற்று தொடரை கைப்பற்றி 2-0 என முன்னிலையில் இருக்கிறது.
இந்நிலையில் டெஸ்ட் அணிகளுக்கான ஐ.சி.சி. தரவரிசை நேற்றைய போட்டிகள் முடிவின் அடிப்படையில் வெளியிடப்பட்டது.
இதில் இந்தியா 123 புள்ளிகள் பெற்று தொடர்ந்து முதல் இடத்தில் நீடிக்கிறது. பல்லேகலேயில் நடைபெற இருக்கும் 3-வது போட்டியில் இந்தியா தோல்வியடைந்தாலும் ஒரேயொரு புள்ளியைத்தான் இழக்கும். இதனால் இந்திய அணிக்கு பெரிய பாதிப்பு கிடையாது. அதேவேளையில் போட்டியில் வெற்றி பெற்று 3-0 எனத் தொடரைக் கைப்பற்றினால் 2 புள்ளிகள் அதிகரித்து 125 புள்ளிகளுடன் முதல் இடத்தில் இருக்கும்.
இங்கிலாந்தாக்கு எதிராக தொடரை 1-3 என இழந்த தென்ஆப்பிரிக்கா 7 புள்ளிகளை இழந்தது 110 புள்ளிகளுடன் 2-வது இடத்தில் நீடிக்கிறது.
தென்ஆப்பிரிக்காவிற்கு எதிரான தொடரை கைப்பற்றியதன் மூலம் 6 புள்ளிகள் அதிகம் பெற்று 106 புள்ளிகளுடன் 3-வது இடத்திற்கு முன்னேறியுள்ளது இங்கிலாந்து. ஆஸ்திரேலியா 100 புள்ளிகளுடன் 4-வது இடத்தில் உள்ளது. நியூசிலாந்து 97 புள்ளிகளுடன் 5-வது இடத்திலும், பாகிஸ்தான் 93 புள்ளிகளுடன் 6-வது இடத்திலும், இலங்கை 91 புள்ளிகளுடன் 7-வது இடத்திலும், வெஸ்ட் இண்டீஸ் 75 புள்ளிகளுடன் 8-வது இடத்திலும், வங்காள தேசம் 69 புள்ளிகளுடன் 9-வது இடத்திலும் உள்ளது.
