சென்னை:
5-வது புரோ கபடி லீக் போட்டியின் 10-வது கட்ட ஆட்டங்கள் சென்னை நேரு உள்விளையாட்டு அரங்கில் நடைபெற்று வருகிறது.
இந்தப் போட்டியில் முதல் முறையாக பங்கேற்கும் சென்னை நகரை மையமாக கொண்ட தமிழ் தலைவாஸ் அணியின் நிலை மிகவும் பரிதாபமாக உள்ளது.
அஜய்தாக்கூர் தலைமையிலான இந்த அணி 18 ஆட்டத்தில் விளையாடி 4-ல் மட்டுமே வெற்றி பெற்று இருக்கிறது. 12 ஆட்டங்களில் தோற்றது.
2 போட்டி ‘டை’ ஆனது. 35 புள்ளிகளுடன் ‘பி’ பிரிவில் 5-வது இடத்தில் இருக்கும் அந்த அணி ஏற்கனவே ‘பிளேஆப்’ சுற்று வாய்ப்பை இழந்து விட்டது.
தமிழ் தலைவாஸ் அணி சென்னையில் விளையாடிய 5 ஆட்டங்களிலும் தோற்றது பரிதாபமே. புனே, ஜெய்ப்பூர், மும்பை, தெலுங்கு டைட்டன்ஸ், உ.பி. யோதா அணிகளிடம் தோல்வியை தழுவியது.
சென்னையில் இன்று இரவு 8 மணிக்கு நடைபெறும் கடைசி ஆட்டத்தில் தமிழ் தலைவாஸ் அணி பெங்களூர் புலசை சந்திக்கிறது.
இந்த ஆட்டத்தில் வென்று ஆறுதல் அளிக்குமா? என்று தமிழக கபடி ரசிகர்கள் ஆவலுடன் எதிர்நோக்குகின்றனர். பெங்களூர் அணியை ஒருமுறை வென்று இருக்கிறோம். மற்றொரு முறை தோற்றுள்ளோம்.
பெங்களூர் அணி 17 ஆட்டத்தில் 4 வெற்றி, 11 தோல்வி, 2 டையுடன் 34 புள்ளி பெற்று கடைசி இடத்தில் உள்ளது.
