இலங்கைக்கு எதிரான பயிற்சி கிரிக்கெட்: நியூசிலாந்து அணி வெற்றி

பர்மிங்காம் :

சாம்பியன்ஸ் கோப்பை கிரிக்கெட் போட்டிக்கு தயாராகும் விதமாக பர்மிங்காமில் நேற்று நடந்த பயிற்சி ஆட்டம் ஒன்றில் இலங்கை-நியூசிலாந்து அணிகள் சந்தித்தன. ‘டாஸ்’ ஜெயித்த நியூசிலாந்து அணி பீல்டிங்கை தேர்வு செய்தது.

இதன்படி முதலில் பேட்டிங் செய்த இலங்கை அணி நிர்ணயிக்கப்பட்ட 50 ஓவர்களில் 8 விக்கெட் இழப்புக்கு 356 ரன்கள் குவித்தது. அதிகபட்சமாக உபுல் தரங்கா 110 ரன்னும், குசல் மென்டிஸ் 57 ரன்னும், சண்டிமால் 55 ரன்னும் எடுத்தனர். நியூசிலாந்து அணி தரப்பில் டிரென்ட் பவுல்ட், டிம் சவுதி தலா 2 விக்கெட்டும், ஆடம் மில்னே, மெக்லெனஹான், கிரான்ட்ஹோம் தலா ஒரு விக்கெட்டும் கைப்பற்றினார்கள்.

பின்னர் 357 ரன்கள் எடுத்தால் வெற்றி என்ற இலக்குடன் ஆடிய நியூசிலாந்து அணி 46.1 ஓவர்களில் 4 விக்கெட் இழப்புக்கு 359 ரன்கள் எடுத்து 6 விக்கெட் வித்தியாசத்தில் வெற்றி பெற்றது. நியூசிலாந்து அணியில் மார்ட்டின் கப்தில் 116 ரன்னிலும் (76 பந்துகளில் 10 பவுண்டரி, 5 சிக்சருடன்), கனே வில்லியம்சன் 88 ரன்னிலும் (60 பந்துகளில் 7 பவுண்டரி, 4 சிக்சருடன்) ஓய்வு பெற்றனர். இலங்கை அணி தரப்பில் பிரசன்னா 2 விக்கெட் வீழ்த்தினார்.