புனே:
சர்வதேச டென்னிஸ் சம்மேளனம் (ஐ.டி.எப்.) சார்பில் மகளிர் டென்னிஸ் சாம்பியன்ஷிப் போட்டிகள் 2001-ம் ஆண்டு முதல் தொடர்ச்சியாக ஆண்டுதோறும் புனே நகரில் நடத்தப்பட்டு வருகிறது. இப்போட்டியின் இறுதி போட்டி இன்று நடைபெற்றது.
இதில், 2-ம் நிலை வீராங்கனையான ஸ்பெயினின் ஜார்ஜினா கார்சியா, நான்காம் நிலை வீராங்கனையான பிரட்டனின் கேட்டி டியூனை எதிர்கொண்டார். சுமார் 1 மணி நேரம் 40 நிமிடம் நீடித்த இந்த போட்டியில், ஜார்ஜினா வெற்றி பெற்றார்.
முதல் செட்டை 6-4 என்ற செட் கணக்கில் ஜார்ஜினா கைப்பற்றினார். தொடர்ந்து நடைபெற்ற இரண்டாவது செட்டில் இரு வீராங்கனைகளும் சிறப்பான ஆட்டத்தை வெளிகாட்டினர். இறுதியில் ஜார்ஜினா, அந்த சுற்றையும் 7-5 என கைப்பற்றினார். இதன்மூலம் 6-4, 7-5 என்ற நேர் செட்களில் வெற்றி பெற்ற ஜார்ஜினா, சாம்பியன் பட்டத்தை தட்டிச்சென்றார்.
இது ஆசியாவில் ஜார்ஜினா வெல்லும் முதல் சாம்பியன் பட்டமாகும். சாம்பியன் பட்டம் வென்ற ஜார்ஜினாவுக்கு 50 தரப்புள்ளிகளும், இரண்டாம் இடம் பிடித்த கேட்டி டியூனுக்கு 30 தரப்புள்ளுகளும் வழங்கப்பட்டது.
