புதுடெல்லி:
இந்தியாவில் 17 வயதிற்குட்பட்டோருக்கான உலகக்கோப்பை கால்பந்து தொடர் 6-ம் தேதி தொடங்கியது. நேற்று (14-ம் தேதி) நான்கு லீக் ஆட்டங்கள் நடைபெற்றன.
கவுஹாத்தியில் 5 மணிக்கு தொடங்கிய லீக் ஆட்டத்தில் ‘ஈ’ பிரிவில் இடம்பிடித்துள்ள ஹாண்டுரஸ் - பிரான்ஸ் அணிகள் மோதின. இப்போட்டியில் பிரான்ஸ் 5-1 என்ற கோல் கணக்கில் அபாரமாக வெற்றி பெற்றது. பிரான்ஸ் தரப்பில் இசிடோர் (14-வது நிமிடம்), ஃப்லிப்ஸ் (23-வது மற்றும் 64-வது நிமிடம்), கவுரி (86-வது நிமிடம்), அட்லி (90+6-வது நிமிடம்) கோல் அடித்தனர். ஹாண்டுரசில் மேஜியா 10-வது நிமிடத்தில் ஒரு கோல் அடித்தார்.
கொல்கத்தாவில் 8 மணிக்கு தொடங்கிய மற்றொரு ஆட்டத்தில் ‘எஃப்’ பிரிவில் இடம்பிடித்துள்ள ஈராக் - இங்கிலாந்து அணிகள் மோதின. இப்போட்டியில் இங்கிலாந்து அணி, 4-0 என்ற கோல் கணக்கில் வெற்றி பெற்றது. இங்கிலாந்து தரப்பில் கோமெஸ் (11-வது நிமிடம்), ஸ்மித் ரோவே (57-வது நிமிடம்), லோடர் (59-வது மற்றும் 71-வது நிமிடம்) கோல் அடித்தனர்.
கொல்கத்தாவில் 5 மணிக்கு தொடங்கிய முதல் லீக் ஆட்டத்தில் ‘ஈ’ பிரிவில் இடம்பிடித்துள்ள ஜப்பான் - நியூ கலிடோனியா அணிகள் மோதின. இப்போட்டி 1-1 என்ற கோல் கணக்கில் டிரா ஆனது. ஜப்பானின் நாகுமுரா 7-வது நிமிடத்திலும், நியூ கலிடோனியாவின் ஜெனோ 83-வது நிமிடத்திலும் கோல் அடித்தனர்.
கவுஹாத்தியில் 8 மணிக்கு தொடங்கிய மற்றொரு ஆட்டத்தில் ‘எஃப்’ பிரிவில் இடம்பிடித்துள்ள மெக்சிகோ - சிலி அணிகள் மோதின. இப்போட்டியில் இரு அணியினரும் ஒரு கோல் கூட அடிக்கவில்லை, இதனால் இந்த ஆட்டமும் டிராவில் முடிந்தது.
லீக் சுற்று ஆட்டங்கள் நேற்றுடன் நிறைவடைந்தன. இரண்டாம் கட்டமாக நாக்-அவுட் சுற்று ஆட்டங்கள் நாளை தொடங்குகின்றன. நாளைய ஆட்டங்களில் கொலம்பியா - ஜெர்மனி, பராகுவே - அமெரிக்கா அணிகள் மோத உள்ளன.
