நியூசிலாந்து அணியின் அதிரடி பேட்ஸ்மேனாக திகழ்ந்தவர் பிராண்டன் மெக்கல்லம். தனது அதிரடியால் உலகம் முழுவதும் கோடிக்கணக்கில் ரசிகர்களை பெற்றுள்ளார். இவர் சர்வதேச கிரிக்கெட்டில் இருந்து ஓய்வு பெற்றாலும், டி20 லீக் ஆட்டங்களில் விளையாடி வருகிறார்.
இந்திய கிரிக்கெட் வாரியத்தால் நடத்தப்படும் ஐ.பி.எல். தொடரில் மெக்கல்லம் சென்னை சூப்பர் கிங்ஸ் அணிக்காக விளையாடிக் கொண்டிருந்தார். அந்த அணிக்கு தடை விதித்ததால் குஜராத் லயன்ஸ் அணிக்காக விளையாடி வருகிறார்.
இந்த சீசனில சிறந்த ஆட்டத்தை வெளிப்படுத்தினார். காலில் ஏற்பட்ட காயம் காரணமாக தொடர் முழுவதும் அவரால் விளையாட முடியாமல் போனது.
ஐ.பி.எல். தொடரில் விளையாடுவதற்காக பிராண்டன் மெக்கல்லம் சுமார் ஏழரை கோடி ரூபாய் சம்பளம் வாங்குகிறார் என்று நியூசிலாந்து இணைய தளம் ஒன்று செய்தி வெளியிட்டிருந்தது.
ஆனால், பிராண்டன் மெக்கல்லம் இதை மறுத்துள்ளார். இதுகுறித்து தனது டுவிட்டர் பக்கத்தில், ‘‘சென்னை சூப்பர் கிங்ஸ் அணிக்காக விளையாடியபோது ஏழரை கோடி ரூபாய் சம்பளம் வாங்கினேன். தற்போது அதில் பாதியான சுமார் 3.75 கோடி ரூபாய்தான் வாங்குகிறேன். என்னுடைய சம்பளம் குறைக்கப்பட்டுள்ளது’’ என்று குறிப்பிட்டுள்ளார்.
இதற்கு பதில் டுவிட் செய்துள்ள கெவின் பீட்டர்சன், ‘‘கஷ்டப்பட்டு விளையாடி இவ்வளவு சம்பளம் வாங்குவதை விட, எங்களுடன் வர்ணனை செய்ய வந்து விடுங்கள். அதை விட அதிக அளவில சம்பாதிக்கலாம்’’ என்று ஜாலியாக கூறியுள்ளார். அதற்கு மெக்கல்லமும் ‘வர்ணனை செய்ய வருகிறேன்’ என்று பதில் அளித்துள்ளார்.
இதுதொடர்பாக, இருவருக்கும் இடையிலான சுவாரஸ்யமான டுவிட்டர் உரையாடல் சிறிது நேரம் நீடித்தது.
