ஆடவைக்கும் ஆனந்த சிகிச்சை ‘டான்ஸ் மூவ்மெண்ட் தெரபி’

புதிது புதிதாக பல ‘தெரபி’கள், அதாவது சிகிச்சை முறைகள் தோன்றிக்கொண்டிருக்கின்றன. அவற்றில் ஒன்று, ‘டான்ஸ் மூவ்மெண்ட் தெரபி’ எனப்படும் நடன அசைவுச் சிகிச்சை. பெருநகரங்களில் மெல்ல மெல்ல ஆனால் சீராகப் பிரபலமாகி வருகிறது, ‘டான்ஸ் தெரபி’. மனநலம், உடல்நலம் சார்ந்த பிரச்சினைகளுக்கு இந்தப் புதிய சிகிச்சை முறை நல்ல பலன் கொடுப்பதாகக் கூறுகின்றனர், இதில் ஈடுபட்டவர்கள்.

பெங்களூருவைச் சேர்ந்த கமலா இதற்கு ஒரு உதாரணம். அலுவலக டென்ஷன், கமலாவின் சொந்த வாழ்க்கையையும் பாதிக்கத் தொடங்கியிருந்தது. அவரின் தன்னம்பிக்கையும் குலைந்தது. ஒருமுறை அவரது நிறுவனம் சார்பில் ஊழியர் களுக்கு நடன சிகிச்சை நிகழ்ச்சிக்கு ஏற்பாடு செய்தபோது, ‘போய்த்தான் பார்க்கலாமே’ என்ற மனநிலையில் கமலா போனார். இன்று, ‘நடன அசைவு சிகிச்சை’ தன் வாழ்க்கையில் பிரிக்க முடியாத அங்கம் என்கிறார்.

“சில எளிமையான அசைவுகளின் மூலம், என் உடல், மனம், ஆத்மாவுக்கு இடையே ஒரு தொடர்பை ஏற்படுத்த இந்த தெரபி உதவியது. நடன அசைவு சிகிச்சை என்பதாலேயே நடனம் போலவே உடம்பை அசைக்க வேண்டும் என்பதில்லாமல், நான் எனக்கு வசதியான விதத்தில், நான் அறிந்த விதத்தில் உடம்பை அசைக்கிறேன். குறிப்பிட்டபடிதான் உடம்பை அசைக்க வேண்டும் என்ற நிர்ப்பந்தம் இல்லை. நடன அசைவுகளுடன், மூச்சுப் பயிற்சி போன்ற வேறு சில பயிற்சிகளும் உண்டு. இவையெல்லாம் சேர்ந்து ஒரு சுய விழிப்புணர்வையும், சுகமான மனநிலையையும் ஏற்படுத்துகின்றன” என்று கமலா கூறுகிறார்.

வேலை நெருக்கடி தவிர, மனஅழுத்தத்துக்கும் நடன அசைவுச் சிகிச்சை நல்ல மருந்தாகிறதாம்.

15 வயது சுனிதாவுக்கு அவரது பெற்றோருடன் எப்போதும் பிரச்சினை. ஒரு கட்டத்தில், பெற்றோருடன் எதுவும் பேசாமல் தன்னைத்தானே தனிமைப்படுத்திக்கொண்டாள். அவளது பெற்றோர், நடன அசைவுச் சிகிச்சை நிபுணர் தீபா மகேஷிடம் அவளை அழைத்துச்சென்றிருக்கிறார்கள்.

“வித்தியாசமான அசைவுகளை சுனிதா விரும்புவது தெரிந்தது. எனவே நான் அப்படிப்பட்ட அசைவுகள் மூலம் அவளுக்கு சிகிச்சை அளித்தேன். இன்று சுனிதாவிடம் அபாரமான மாற்றம் ஏற்பட்டிருக்கிறது. அவளுக்குள் ஒரு தெளிவு பிறந்திருக்கிறது” என்கிறார் தீபா.

உடல், மனநலப் பிரச்சினைகளால் அவதிப்படுபவர்கள், அவற்றை ஒரு வேடிக்கையான, எளிதான வழியில் எதிர்கொள்வதற்கு இந்தச் சிகிச்சை முறை உதவுகிறது என்கிறார்கள்.



இந்தச் சிகிச்சை வகுப்பு ஒன்றில், நடன அசைவுகளுடன், தியானம், யோகாசனம், ‘தாய்சி’ தற்காப்புக் கலை, உணர்வுகளை வெளிப்படுத்தும் கலை, நாடகம், பெயிண்டிங், காட்சிக் கலை எனப் பலதும் அடங்கும்.

இந்திய நடன அசைவுச் சிகிச்சை அமைப்பின் நிறுவனர், திரிபுரா காஷ்யப். மனரீதியான, உடல் ரீதியான, உணர்வுரீதியான பிரச்சினைகளைச் சரிசெய்வதற்குச் சரியான வழி, நடன அசைவு சிகிச்சை என்கிறார், காஷ்யப்.

தனது நடன அசைவுச் சிகிச்சையில், யோகா, பாரம்பரிய மற்றும் நாட்டுப்புற நடனங்கள், தற்காப்புக் கலைகள், நாடகம், பேச்சில்லா நடிப்பு, ‘ரிலாக்ஸ்’ செய்யும் நுட்பங்கள் எனப் பலவற்றையும் கலந்திருப்பதாக இவர் கூறுகிறார். இந்தச் சிகிச்சைக்காக வருபவர்களின் உடல் நிலையையும் கவனத்தில் கொள்கிறோம் என்கிறார்.

மனநெருக்கடி, மனஅழுத்தம், தன்னம்பிக்கைக் குறைவு, கவனக் குறைபாடு போன்ற பிரச்சினை உள்ளவர்களுக்கு நடன அசைவுச் சிகிச்சை நல்ல பலனைத் தருமாம். ஆட்டிசம், சீசோபிரெனியா, நீடித்த வலி, மூட்டு வலி, ஞாபகமறதிக் குறைபாடு, உணவு உண்ணுதல் தொடர்பான பிரச்சினை உள்ளவர்களும் இந்த சிகிச்சையை முயற்சிக்கலாம் என்கிறார்கள். ஆனால் எல்லோருக்கும் பொத்தாம்பொதுவான சிகிச்சை முறை என்பதில்லை. ஒருவரின் பிரச்சினை, உடல்நிலையை அளவிட்டு அதற்கேற்ப இந்த தெரபிஸ்ட்கள் சிகிச்சையை வடிவமைக்கிறார்கள்.

“இங்கே பேச்சு என்பது குறைவுதான். அசைவுகள்தான் அதிகம். நாங்கள் எங்களிடம் சிகிச்சைக்கு வருபவர்களின் மனதைவிட உடம்பில் அதிக கவனம் செலுத்துகிறோம். காரணம், வார்த்தைகளை விட, வார்த்தைகளற்ற தொடர்பு முறையில் நம்மால் நிறையப் பேச முடியும்” என்கிறார் நடன அசைவுச் சிகிச்சையாளர், தாமினி. பாலியல் ரீதியான பிரச்சினையுடன் வரும் பெண்களுக்கு தான் ‘பெல்லி’ நடன அசைவுகளைப் பயன்படுத்துவதாகக் கூறுகிறார் இவர்.

நடன அசைவுச் சிகிச்சை என்பது அப்படியே நடனம் ஆடுவது போன்றதா?

“நடனத்தில் சில நுட்பங்களும், அழகியல் உணர்வுகளும் வெளிப்படும். ஆனால் நடன அசைவுச் சிகிச்சை பெறுபவர், அப்படி எந்த நுட்பங்களையும் அறிந்துகொள்ள வேண்டியதில்லை. நடனத் தத்துவம், புதுமைத்திறன், இயல்பான தன்மை எல்லாவற்றையும் கலந்து நாங்கள் இதை உருவாக்கியிருக்கிறோம்” என்கிறார்கள் இந்தச் சிகிச்சையாளர்கள்.

வாழ்வில் பிரச்சினைகளால் அவதிப்படும்போது நடனம், ஓவியம் போன்றவற்றில் கவனத்தைத் திசைதிருப்பும்படி கூறப்படுவதுண்டு. ஆனால் நடன அசைவுச் சிகிச்சையோ, பிரச்சினையை நேருக்கு நேர் எதிர்கொள்ளுங்கள் என்கிறது.

“பிரச்சினையில் இருந்து தப்பிக்க முயற்சிக்காமல், அதை எப்படிக் கையாளவேண்டும் என்று நாங்கள் சொல்லிக்கொடுக்கிறோம். நடனமே இயல்பாக நன்மை அளிக்கக்கூடியது. அந்தத் தன்மையை நாங்கள் பிரதானமாகப் பயன்படுத்திக்கொள்கிறோம்” என்கிறார்கள்.

இதில் இசைக்கும் அதிக முக்கியத்துவம் இருக்கிறது. சிகிச்சை பெறுபவரின் மனநிலைக்குத் தேவையான இசையைப் பயன்படுத்துகிறார்கள்.

உடம்புக்கும் மனதுக்கும் ஒரு நல்லிணக்கத்தை ஏற்படுத்தும் நடன அசைவுச் சிகிச்சை எல்லோருக்கும் ஏற்றது, எந்தப் பக்கவிளைவுகளும் இல்லாதது என்று நடன அசைவுச் சிகிச்சையாளர்கள் ‘கோரஸ்’ குரலில் கூறுகிறார்கள்.



நடன அசைவுச் சிகிச்சை கட்டங்கள்

நடன அசைவுச் சிகிச்சையில் ஐந்து கட்டங்கள் இருப்பதாகவும், அவை பலன் கொடுப்பதற்கு எட்டு முதல் ஒன்பது மாதங்கள் வரை ஆகும் என்றும் சொல்கிறார்கள்.

அசைவுகளை கவனிப்பது: இதில், ஒரு நடன அசைவுச் சிகிச்சையாளர் தன்னிடம் வருபவரின் அசைவுகளைக் கவனிக்கிறார்.

அசைவுகளை மேற்கொள்வது: சிகிச்சைக்கு வந்தவரை பலவித வேடிக்கையான அசைவுகளைச் செய்யும்படி சிகிச்சையாளர் கூறுகிறார். சிகிச்சை பெறுபவர் தானே புதுவிதமான அசைவுகளை மேற்கொள்ளலாம்.

அசைவுகளால் வெளிப்படுத்தல்: சிகிச்சை பெறுபவர், தான் போராடும் எண்ணங்கள், உணர்வுகளை அசைவுகளால் வெளிப்படுத்துகிறார்.

தீர்வு: சிகிச்சையாளரின் உதவியுடன் சிகிச்சை பெறுபவர் தனக்கான தீர்வை தானே கண்டு பிடிக்கிறார்.

ஒருங்கிணைப்பு: சிகிச்சையில் பெற்ற நற்பலன்கள், சிகிச்சை பெற்றவரின் அன்றாட வாழ்க்கையுடன் ஒருங்கிணைக்கப்படுகின்றன.

நடன அசைவுச் சிகிச்சையின் நற்பலன்கள்

தொடர்பை ஏற்படுத்துதல்: மனதுக்கும் உடம்புக்கும் இடையே ஒரு தொடர்பை உண்டாக்க உதவுகிறது.

எளிமையாக்குதல்: மனதுக்கும் உடம்புக்கும் இடையே தொடர்பு ஏற்பட்டவுடன், மனதையும், உடம்பையும் பாதிக்கும் பிரச்சினைகளைக் கையாளுவது எளிமையாக்கப்படுகிறது.

மனநெருக்கடியைக் குறைத்தல்: உடல்ரீதியாக மட்டுமின்றி மனரீதியாகவும் கைகொடுக்கிறது. உணர்வுச் சமநிலைக்குக் கைகொடுக்கிறது.

தன்னம்பிக்கையை அதிகரித்தல்: பிரச்சினைகளுக்குத் தீர்வு காண்பதன் வாயிலாக, ஒரு தன்னம்பிக்கை உணர்வையும், நேர்மறை மனநிலையையும் ஏற்படுத்துகிறது.

சுயத்திறனை ஊக்குவித்தல்: சிகிச்சை பெறுபவர்கள் தாங்கள் விரும்பும் விதத்தில் அசைவுகளை மேற்கொள்ள அனுமதிப்பதன் மூலம், சுயத் திறனை இந்தச் சிகிச்சை முறை ஊக்குவிக்கிறது.