கலிபோர்னியா: போதை பார்ட்டியில் தீ விபத்து - 9 பேர் பலி

நியூயார்க்:

அமெரிக்காவின் கலிபோர்னியா மாநிலத்தில் உள்ள ஓக்லாந்து பகுதியில் ஒரு பாழடைந்த பண்டகச்சாலையில் நேற்றிரவு மது விருந்துடன் நடன நிகழ்ச்சி நடைபெற்றது. இந்த விருந்தில் சுமார் 100 பேர் கலந்துகொண்டனர். அவர்களில் பலர் வெளிநாடுகளை சேர்ந்த தொழிலாளர்கள் என தெரியவருகிறது.

பின்னிரவு வேளையில் ஆட்டம், பாட்டம், கொண்டாட்டம் என்று கும்மாளம் களைகட்டியிருந்தபோது அந்த பண்டகச்சாலையின் முதல் மாடியில் ஏற்பட்ட தீ விபத்தில் சிக்கிய பலர் பலியானதாக தகவல் வெளியாகியுள்ளது.

தகவல் அறிந்து விரைந்துவந்த தீயணைப்பு மற்றும் மீட்புப் படையினர் 9 பிரேதங்களை இதுவரை மீட்டுள்ளனர். பலர் தீக்காயங்களுடன் ஆஸ்பத்திரிகளில் அனுமதிக்கப்பட்டுள்ளனர். அவர்களில் பலரது நிலைமை கவலைக்கிடமாக இருப்பதால் பலி எண்ணிக்கை மேலும் அதிகரிக்கக்கூடும் என அஞ்சப்படுகிறது.