ஆஸ்திரேலிய டெஸ்ட் அணி இரண்டு போட்டிகள் கொண்ட தொடரில் விளையாடுவதற்காக வங்காள தேசம் சென்றுள்ளது. இரு அணிகளுக்கு இடையிலான முதல் டெஸ்ட் வருகிற 27-ந்தேதி டாக்கா மைதானத்தில் தொடங்குகிறது. இதற்காக வங்காள தேச அணி தயாராகி வருகிறது.
இந்நிலையில் சொந்த மண்ணில் வங்கப் புலிகளை தோற்கடிக்க முடியாது என்று அந்த அணியின் ஆல்ரவுண்டர் சாஹிப் அல் ஹசன் ஆஸ்திரேலிய அணிக்கு எச்சரிக்கை விடுத்துள்ளார்.
இதுகுறித்து சாஹிப் அல் ஹசன் கூறுகையில் ‘‘முன்னதாக பெரிய அணிகளுக்கு எதிராக விளையாடும்போது டிரா செய்தாலே போதும் என்ற மனநிலையில்தான் விளையாடுவோம். ஐந்து நாட்கள் எப்படியாவது தாக்குப்பிடித்து டிரா செய்துவிட வேண்டும் என்று விரும்புவோம். ஆனால், டிரா என்ற முடிவை நாங்கள் எட்டியது கிடையாது.
அப்புறம் வெற்றி பெற முயற்சி செய்ய வேண்டும் என்று விரும்பினோம். இந்த மனநிலை மாற்றம் எங்களால் வெற்றி பெற முடியும் என்ற நம்பிக்கையை எங்களுக்கு கொடுத்தது. இங்கிலாந்து மற்றும் இலங்கை அணிக்கு எதிராக வெற்றி பெறுவதற்காக நீணட நாட்கள் பயணம் செய்ய வேண்டியிருந்தது. இது நம்ப முடியாதது.
இந்த அளவிற்கு வங்காள தேச அணி முன்னேறும் என்ற பெரும்பாலான மக்கள் நினைத்திருக்க மாட்டார்கள். போட்டிகளில் வெற்றி பெறுவதன் மூலம்தான் நம்பிக்கையை பெற முடியும். தற்போது எங்களது நம்பிக்கையில் எந்த குறைவும் இல்லை. எங்களது சொந்த மண்ணில் நாங்கள் தோற்றகடிக்க முடியாத அணி என்று உணர்கிறோம். எங்களுக்கு எதிராக யார் விளையாடுகிறார்கள் என்பது எங்களுக்கு பிரச்சினை கிடையாது’’ என்றார்.
