ஐ.பி.எல். எலிமினேட்டர் சுற்று: கொல்கத்தா அணியின் வெற்றிக்கு 129 ரன்கள் இலக்கு வைத்தது ஐதராபாத்

பெங்களூரு:

ஐ.பி.எல். கிரிக்கெட் தொடரில் இன்று வெளியேற்றுதல் சுற்று (எலிமினேட்டர்) ஆட்டம் பெங்களூரு சின்னச்சாமி ஸ்டேடியத்தில் நடைபெறுகிறது. இதில், லீக் போட்டிகளின் முடிவில், புள்ளி பட்டியலில் 3-வது இடம் பிடித்த ஐதராபாத் சன் ரைசர்ஸ், 4-வது இடம் பெற்ற கொல்கத்தா நைட் ரைடர்ஸ் அணிகள் விளையாடி வருகின்றன.

டாஸ் வென்ற கொல்கத்தா அணி பீல்டிங்கைத் தேர்வு செய்தது. இதனால் ஐதராபாத் அணி முதலில் பேட்டிங் செய்தது. இந்த ஆட்டத்தில் வெற்றி பெறும் அணி பெங்களூருவில் 19-ந் தேதி நடைபெறும் இறுதிப்போட்டிக்கான 2-வது தகுதி சுற்றில் விளையாடும். தோற்கும் அணி போட்டியை விட்டு வெளியேற வேண்டும் என்பதால், ஐதராபாத் அணி கவனமாக ஆடியது.

துவக்க வீரர்களாக கேப்டன் வார்னர்- ஷிகர் தவான் களமிறங்கினர். இந்த ஜோடி 25 ரன்கள் சேர்த்த நிலையில், முதல் விக்கெட் விழுந்தது. 11 ரன்கள் எடுத்த ஷிகர் தவான், உமேஷ் யாதவ் பந்தில் விக்கெட்டை இழந்தார். அதன்பின்னர் வில்லியம்சன் 26 பந்துகளில் 24 ரன்களிலும், வார்னர் 35 பந்துகளில் 37 ரன்கள் சேர்த்தும் ஆட்டமிழந்தனர். 10 ஓவர்களைக் கடந்தபிறகும் அடித்து ஆடாததால் ரன்ரேட் குறைந்தது.



காயத்துடன் ஆடிய யுவராஜ் சிங், 9 பந்துகளில் 2 பவுண்டரி உள்பட 9 ரன்கள் மட்டுமே அடித்தார். தமிழகத்தைச் சேர்ந்த விஜய் சங்கர் 17 பந்துகளை சந்தித்து 2 பவுண்டரி ஒரு சிக்சருடன் 22 ரன்கள் சேர்த்து அவுட் ஆனார், ஜோர்டான் டக் அவுட் ஆகி ஏமாற்றம் அளித்தார். ஓஜா 16 ரன்கள் சேர்த்த நிலையில், கடைசி பந்தில் ஆட்டமிழந்தார். இதனால், நிர்ணயிக்கப்பட்ட 20 ஓவர் முடிவில் சன்ரைசர்ஸ் ஐதராபாத் அணி 7 விக்கெட் இழப்பிற்கு 128 ரன்கள் சேர்த்தது.

கொல்கத்தா தரப்பில் வேகப்பந்து வீச்சாளர் நாதன் கோல்ட்டர் நீல் 3 விக்கெட்டுகளை வீழ்த்தினார். உமேஷ் யாதவ் 2 விக்கெட்டும், போல்ட், சாவ்லா ஆகியோர் தலா ஒரு விக்கெட்டும் எடுத்தனர்.

இதையடுத்து 129 ரன்கள் எடுத்தால் வெற்றி என்ற இலக்குடன் கொல்கத்தா அணி களமிறங்குகிறது.