மான்ட்கார்லோ :
மான்ட்கார்லோ மாஸ்டர்ஸ் சர்வதேச டென்னிஸ் போட்டி மொனாக்கோவில் நடந்து வருகிறது. இதில் நேற்று நடந்த ஒற்றையர் பிரிவு கால்இறுதி ஆட்டம் ஒன்றில் தரவரிசையில் 24-வது இடத்தில் இருக்கும் ஆல்பர்ட் ரமோஸ் வினோலாஸ் (ஸ்பெயின்), 8-ம் நிலை வீரர் மரின் சிலிச்சை (குரோஷியா) எதிர்கொண்டார்.
விறுவிறுப்பான இந்த ஆட்டத்தில் ஆல்பர்ட் ரமோஸ் 6-2, 6-7 (5-7), 6-2 என்ற செட் கணக்கில் மரின் சிலிச்க்கு அதிர்ச்சி அளித்து அரைஇறுதிக்கு முன்னேறினார்.
மற்றொரு கால்இறுதியில் பெல்ஜியத்தின் டேவிட் கோபின் 6-2, 3-6, 7-5 என்ற செட் கணக்கில் முன்னாள் ‘நம்பர் ஒன்’ வீரர் நோவக் ஜோகோவிச்சை (செர்பியா) சாய்த்தார்.
ஆண்கள் இரட்டையர் பிரிவின் 2-வது சுற்று ஆட்டம் ஒன்றில் ரோகன் போபண்ணா (இந்தியா)-பாப்லோ கியூவாஸ் (உருகுவே) ஜோடி 6-7, 6-4, 10-6 என்ற செட் கணக்கில் ராவென் கிளாசென்(தென்ஆப்பிரிக்கா)-ராஜீவ் ராம் (அமெரிக்கா) இணையை வெளியேற்றி கால்இறுதிக்கு தகுதி பெற்றது.
