நாம் பென்:
இந்தியா-கம்போடியா அணிகள் இடையிலான சர்வதேச நட்புறவு கால்பந்து போட்டி கம்போடிய தலைநகரான நாம் பென் நகரில் இன்று நடைபெற்றது. இந்த போட்டியின் துவக்கத்தில் இந்திய அணி ஆதிக்கம் செலுத்தியது. 36-வது நிமிடத்தில் சுனில் சேத்ரி கோல் அடித்து, கணக்கைத் துவக்கினார். இதற்கு அடுத்த நிமிடத்தில் பதிலடி கொடுத்தது கம்போடியா. அந்த அணியின் குவான் 37-வது நிமிடத்தில் கோல் அடித்ததால், 1-1 என சமன் ஆனது. அதன்பின்னர் முதல் பாதியில் இரு அணிகளும் மேற்கொண்டு கோல் அடிக்கவில்லை.
இரண்டாவது பாதியில் இந்தியா மேலும் இரண்டு கோல்கள் அடித்தது. கம்போடியா ஒரு கோல் அடித்தது. இதனால், 3-2 என்ற கோல் கணக்கில் இந்தியா வெற்றி பெற்றது.
இதன்மூலம், 2006ம் ஆண்டுக்குப் பிறகு, இந்திய அணி அன்னிய மண்ணில் வெற்றி பெற்று சாதனை படைத்துள்ளது. கடைசியாக 2006-ம் ஆண்டு ஜூன் மாதத்தில் நடந்த பாகிஸ்தானுக்கு எதிரான நட்புறவு ஆட்டத்தில் வெற்றி பெற்று இருந்தது.
இந்த வெற்றியின் உற்சாகத்துடன் இந்திய அணி அடுத்து மார்ச் 28-ம் தேதி ஆசியக்கோப்பை தகுதிச்சுற்று ஆட்டத்தில் மியான்மரை எதிர்கொள்கிறது.
