திருவனந்தபுரம்:
திருவனந்தபுரம் மருத்துவ கல்லூரியில் பயிலும் மாணவ-மாணவியர் லெகிங்ஸ், ஜீன்ஸ், மற்றும் டி-ஷர்ட் அணிந்துவர தடை விதிக்கப்பட்டுள்ளது.
இதுதொடர்பாக, திருவனந்தபுரம் மருத்துவ கல்லூரியின் துணை முதல்வர் சமீபத்தில் வெளியிட்ட சுற்றறிக்கையில் மாணவ-மாணவியர் லெகிங்ஸ், ஜீன்ஸ், மற்றும் டி-ஷர்ட் அணிந்துவர தடை விதிக்கப்பட்டுள்ளதாகவும், நேர்த்தியான, சுத்தமான உடைகளையே மாணவர்கள் அணிந்துவர வேண்டும் எனவும் தெரிவிக்கப்பட்டுள்ளது.
மாணவர்கள் பேன்ட், ஷர்ட், ஷூ அணிந்தும், மாணவியர் சுடிதார் அல்லது சேலை அணிந்தும் அடையாள அட்டையுடன் வெள்ளைநிற கோட்களை அணிந்தும் வர வேண்டும் எனவும் வலியுறுத்தப்பட்டுள்ளது. இவைதவிர வேறுவகை உடை அணிந்து மருத்துவ கல்லூரி வளாகத்துக்குள் வர அனுமதிக்கப்பட மாட்டாது எனவும் அறிவுறுத்தப்பட்டுள்ளது.
வளையல், கொலுசு போன்ற ஓசை எழுப்பும் பொருட்களையும் பயன்படுத்த கூடாது என்று வெளியாகியுள்ள இந்த உத்தரவுக்கு மாணவ-மாணவியர்களில் சிலர் எதிர்ப்பு தெரிவித்துள்ளனர்.
இந்திய மருத்துவ கவுன்சில் வெளியிட்டுள்ள அறிவுறுத்தலின்படி இந்த உத்தரவு பிறப்பிக்கப்பட்டுள்ளதாக மருத்துவ கல்லூரி நிர்வாகத்தினர் குறிப்பிடுகின்றனர்.
