சுற்றுச் சூழல் மந்திரியை நாளை தமிழக பா.ஜ.க.வினர் சந்திக்கின்றனர்: பொன்.ராதாகிருஷ்ணன்

சென்னை:

ஜல்லிக்கட்டு போராட்ட குழுவினர் மத்திய இணை மந்திரி பொன்.ராதாகிருஷ்ணனை சென்னையில் உள்ள பா.ஜ.க. அலுவலகமான கமலாயத்தில் சந்தித்தனர். அப்போது, ஜல்லிக்கட்டு குறித்த கோரிக்கை மனுவை பொன்.ராதாகிருஷ்ணனிடம் இளைஞர்கள் வழங்கினர்.

இந்த சந்திப்பிற்கு பொன்.ராதாகிருஷ்ணன் செய்தியாளர்களிடம் கூறியதாவது:-

தமிழக பா.ஜ.க. பிரதிநிதிகள் மத்திய சுற்றுச் சூழல் மந்திரியை நாளை ( வெள்ளிக்கிழமை) சந்திக்க உள்ளனர். இந்த சந்திப்பில் ஜல்லிக்கட்டு ஆர்வலர்களும் பங்கேற்கின்றார்கள்.

பிரதமரை சந்திக்க தொடர் முயற்சி மேற்கொள்கிறேன். பீட்டா அமைப்பை பற்றி பேசுவதை அவமானமாக கருதுகிறேன். இளைஞர்கள் நியாயமான முறையில் போராடி வருகின்றனர்

இவ்வாறு அவர் கூறினார்.

பொன்.ராதாகிருஷ்ணனை சந்தித்த பிறகு செய்தியாளர்களிடம் பேசிய இளைஞர்கள் குழுவினர் தங்களது போராட்டம் தொடரும் என திட்டவட்டமாக தெரிவித்தனர்.