மான்செஸ்டர்:
இங்கிலாந்தில் பெண்கள் கால்பந்து போட்டிக்கு நல்ல வரவேற்பு உள்ளதால், கால்பந்து விளையாட்டு வளர்ந்து வருகிறது. சமீபத்தில் நடந்து முடிந்த ஐரோப்பிய சாம்பியன்ஷிப் தொடரில், இங்கிலாந்து அணி அரையிறுதி வரை முன்னேறி அசத்தியது. கடந்த வாரம் நடைபெற்ற அரையிறுதிப் போட்டியில் இங்கிலாந்து அணி நெதர்லாந்து அணியிடம் தோல்வி அடைந்தது. இப்போட்டியை பிரிட்டனில் தொலைக்காட்சி வாயிலாக 4 மில்லியன் ரசிகர்கள் பார்த்து ரசித்துள்ளனர்.
இந்நிலையில், 2021ம் ஆண்டு பெண்களுக்கான ஐரோப்பிய சாம்பியன்ஷிப் தொடரை இங்கிலாந்தில் நடத்த முயற்சி செய்யப்படும் என இங்கிலாந்து கால்பந்து சங்கம் இன்று தெரிவித்துள்ளது. இந்த ஆண்டு இறுதியில் இதற்கான போட்டியில் இணைய உள்ளதாகவும் தெரிவிக்கப்பட்டுள்ளது.
இந்த ஆண்டு யூரோ தொடரில் இங்கிலாந்து வீராங்கனைகளின் சிறப்பான ஆட்டம் நாட்டிற்கு பெருமை சேர்த்திருப்பதாகவும், மிகப்பெரிய ஐரோப்பிய தொடரை நடத்தும் அளவுக்கு குறிப்பிடத்தக்க தாக்கத்தை ஏற்படுத்தியிருப்பதாகவும் இங்கிலாந்து கால்பந்து சங்க தலைமை செயல் அதிகாரி தெரிவித்தார்.
