லார்ட்ஸ் டெஸ்ட்: பென் ஸ்டோக்ஸ் வேகத்தில் 123 ரன்னில் சுருண்டது வெஸ்ட் இண்டீஸ்

இங்கிலாந்து - வெஸ்ட் இண்டீஸ் அணிகளுக்கு இடையிலான 3-வது டெஸ்ட் லார்ட்ஸில் இன்று தொடங்கியது. டாஸ் வென்ற வெஸ்ட் இண்டீஸ் அணி பேட்டிங் தேர்வு செய்தது.

அதன்படி பிராத்வைட், பொவேல் தொடக்க வீரர்களாக களம் இறங்கினார்கள். பிராத்வைட் 10 ரன்கள் எடுத்த நிலையில் ஆட்டம் இழந்தார். அடுத்து வந்த கைல் ஹோப் ரன்ஏதும் எடுக்காமல் வெளியேறினார். இரண்டு விக்கெட்டுக்களையும் ஆண்டர்சன் வீழ்த்தினார்.



அதன்பின் வந்த ஷாய் ஹோப் 29 ரன்னிலும், தொடக்க வீரர் பொவேல் 39 ரன்னிலும் ஆட்டமிழக்க, வெஸ்ட் இண்டீஸ் விக்கெட்டுக்களை சீட்டுக்கட்டு போல் மளமளவென சரிந்தது. பென் ஸ்டோக்ஸ் 6 விக்கெட்டுக்கள் வீழ்த்த வெஸ்ட் இண்டீஸ் அணி முதல் இன்னிங்சில் 123 ரன்னில் சுருண்டது.



பென் ஸ்டோக்ஸ் 14.3 ஓவரில் 22 ரன்கள் விட்டுக்கொடுத்து 6 விக்கெட்டுக்கள் வீழ்த்தினார். ஆண்டர்சன், ரோலண்ட்-ஜோன்ஸ் ஆகியோர் தலா 2 விக்கெட்டுக்கள் வீழ்த்தினார்கள். பின்னர் இங்கிலாந்து முதல் இன்னிங்சை தொடங்கி விளையாடி வருகிறது.