ஹெட்லிங்லே டெஸ்ட்: வெஸ்ட் இண்டீஸ் 427 ரன்கள் குவிப்பு; இங்கிலாந்தை விட 169 ரன்கள் முன்னிலை

இங்கிலாந்து - வெஸ்ட் இண்டீஸ் அணிகளுக்கு இடையிலான 2-வது டெஸ்ட் லீட்ஸ் ஹெட்டிங்லே மைதானத்தில் நடைபெற்று வருகிறது. டாஸ் வென்று முதலில் பேட்டிங் செய்த இங்கிலாந்து 258 ரன்கள் சேர்த்து ஆல்அவுட் ஆனது.

பின்னர் முதல் இன்னிங்சை தொடங்கிய வெஸ்ட் இண்டீஸ் நேற்றைய 2-வது நாள் ஆட்டத்தில் பிராத் வைட், ஷாய் ஹோப் ஆகியோரின் சதத்தால் 5 விக்கெட் இழப்பிற்கு 329 ரன்கள் குவித்திருந்தது. ஷாய் ஹோப் 147 ரன்னுடனும், பிளாக்வுட் 21 ரன்களுடனும் களத்தில் இருந்தனர். பிராத் வைட் 134 ரன்கள் எடுத்து ஆட்டமிழந்தார்.


49 ரன்கள் எடுத்த பிளாக்வுட்

இன்று 3-வது நாள் ஆட்டம் தொடங்கியது. முதல் ஓவரை ஆண்டர்சன் வீசினார். முதல் பந்தில் ஷாய் ஹோப் 147 ரன்னிலும், அடுத்த பந்தில் டவ்ரிச் ரன்ஏதும் எடுக்காமலும் ஆட்டம் இழந்தனர். இந்த இரண்டு விக்கெட்டுடன் ஆண்டர்சன் முதல் இன்னிங்சில் ஐந்து விக்கெட்டுக்கள் வீழ்த்தினார்.


43 ரன்கள் சேர்த்த ஹோல்டர்

அடுத்து வந்த கேப்டன் ஹோல்டர், பிளாக்வுட் உடன் இணைந்து சிறப்பான ஆட்டத்தை வெளிப்படுத்தினார். பிளாக்வுட் 49 ரன்னும், ஹோல்டர் 43 ரன்களும் சேர்த்து ஆட்டம் இழந்தனர். இருவரிடன் ஆட்டத்தாலும் வெஸ்ட் இண்டீஸ் ஸ்கோர் 400 ரன்னைத் தாண்டியது. 10 ரன்கள் எடுத்த நிலையில் கேப்ரியல் கடைசி விக்கெட்டாக ஆட்டமிழக்க வெஸ்ட் இண்டீஸ் அணி முதல் இன்னிங்சில் 427 ரன்கள் குவித்து ஆட்டமிழந்தது.


இங்கிலாந்து அணி தரப்பில் ஆண்டர்சன் 5 விக்கெட்டும், பென் ஸ்டோக்ஸ் இரண்டு விக்கெட்டுக்களும் வீழ்த்தினார்கள். முதல் இன்னிங்சில் இங்கிலாந்து 169 பின்தங்கிய நிலையில் உள்ளது.

முதல் இன்னிங்சில் இங்கிலாந்தை கட்டுப்படுத்தியதுபோல் 2-வது இன்னிங்சிலும் வெஸ்ட் இண்டீஸ் கட்டுப்படுத்தினால் வெற்றி பெற வாய்ப்புள்ளது.