நீங்கள் தேடியது "Mukkombu Dam"

திருச்சி:

கர்நாடக நீர்ப்பிடிப்பு பகுதிகளில் பெய்த பலத்த மழையால் அங்குள்ள அணைகள் நிரம்பியதையடுத்து உபரிநீர் காவிரியில் திறக்கப்பட்டது. இதனால் மேட்டூர் அணை மீண்டும் தனது முழு கொள்ளளவான 120 அடியை எட்டியது.

அணையின் பாதுகாப்பு கருதி உபரிநீர் முழுவதுமாக திறந்து விடப்பட்டது. இதனால் கடந்த 3 நாட்களுக்கு முன்பு அதிகபட்சமாக 2 லட்சத்து 15 ஆயிரம் கனஅடி வரை தண்ணீர் காவிரி ஆற்றில் கரைபுரண்டு ஓடியது.

இருகரைகளையும் தொட்டுச்சென்ற காவிரியுடன் மாயனூரில் பவானி, அமராவதி அணை தண்ணீரும் சேர்ந்து திருச்சியில் உள்ள முக்கொம்பு மேலணைக்கு 2 லட்சத்து 20 ஆயிரம் கனஅடிக்கும் மேல் தண்ணீர் வந்தது.

இதையடுத்து அங்கிருந்து கொள்ளிடத்தில் 1 லட்சத்து 50 ஆயிரம் கனஅடியும், மீதமுள்ள தண்ணீர் காவிரி ஆற்றிலும் திறக்கப்பட்டது. இதனை அமைச்சர் கே.என்.நேரு, கண்காணிப்பு அலுவலர், மாவட்ட கலெக்டர் மா.பிரதீப்குமார் ஆகியோர் பார்வையிட்டனர். அணையின் உறுதித்தன்மை குறித்தும் நீர்வளத்துறை அதிகாரிகளிடம் கேட்டறிந்தனர்.

மேலும் காவிரி கரையோரம் வசிக்கும் பொதுமக்களை பாதுகாப்பான இடங்களுக்கு அப்புறப்படுத்த நடவடிக்கை எடுத்ததோடு, அவர்களுக்கு பல்வேறு இடங்களில் முகாம்கள் அமைத்து தங்கவும் ஏற்பாடுகள் செய்தனர்.

காவிரியில் வெள்ளம் குறையும் வரை அவர்கள் வீடுகளுக்கு செல்ல அனுமதிக்கப்பட மாட்டார்கள் என அமைச்சர் கே.என்.நேரு திட்டவட்டமாக தெரிவித்தார்.

இந்த நிலையில் கடந்த 2 நாட்களாக காவிரியில் தண்ணீர் வரத்து சற்றே குறையத்தொடங்கி உள்ளது. அதாவது இன்று காலை 8 மணி நிலவரப்படி 1 லட்சத்து 90 ஆயிரம் கனஅடி தண்ணீர் வந்து கொண்டிருந்தது.

அதில் காவிரியில 50 ஆயிரம் கனஅடி நீரும், கொள்ளிடம் ஆற்றில் 1 லட்சத்து 31 ஆயிரம் கனஅடி நீரும் திறக்கப்பட்டது.

காவிரியாற்றில் இருகரைகளையும் தொட்டவாறு தண்ணீர் சீறிப்பாய்ந்து செல்லும் அழகை காண விடுமுறை தினமான இன்று காலை முதல் திருச்சி காவிரி பாலத்தில் பொதுமக்கள் ஏராளமானோர் தங்களது குடும்பத்தினருடன் குவிந்து வருகிறார்கள்.

அங்கு பாதுகாப்புக்காக போலீசார் ஈடுபடுத்தப்பட்டு உள்ளனர். அதேபோல் கொள்ளிடம் பழைய இரும்பு பாலத்தின் தூண்கள் இடிந்து விழும் நிலையில் உள்ளது. 20-வது தூண் பகுதி சிறிது சிறிதாக தண்ணீருக்குள் மூழ்கி வருகிறது.

கடந்த சில தினங்களாக காவிரி, கொள்ளிடம் ஆறுகளுக்கு இடையே செல்லும் கல்லணை சாலையில் உத்தமர்சீலி பகுதியில் தரைப்பாலம் முழுவதுமாக மூழ்கியது. மேலும் 300 ஏக்கருக்கும் மேல் வாழையும் வெள்ளத்தில் மூழ்கி சேதமடைந்துள்ளது.

இதனால் உத்தமர்சீலி பகுதியில் அந்த ஊராட்சி நிர்வாகம் சார்பில் சாலையை கடக்க கனரக வாகனங்களுக்கு தடை விதிக்கப்பட்டது. ஆனாலும் ஆபத்தை உணராமல் பொதுமக்கள் அந்த தரைப்பாலத்தை இருசக்கர வாகனம் மற்றும் நடந்து சென்று கடப்பதும், செல்போனில் புகைப்படம் எடுப்பதுமாக இருந்து வருகிறார்கள்.

இன்னும் ஒரு சில தினங்களில் படிப்படியாக வெள்ளம் குறையத் தொடங்கும் என்று எதிர்பார்ப்பதாக நீர்வளத்துறை அதிகாரிகள் தெரிவித்தனர். இதற்கிடையே அரியலூர் மாவட்டம் ஜெயங்கொண்டம் தா.பழூர் அருகே அணைக்குடி கிராமம் கொள்ளிடத்தை ஒட்டி அமைந்துள்ளது.

நேற்றைய தண்ணீர் திறப்பின் அடிப்படையில் கொள்ளிடத்தில் வினாடிக்கு 2 லட்சம் கன அடி நீர் சென்றதால் அந்த கிராமத்தை நீர் சூழ்ந்தது. சுமார் 70 குடும்பங்கள் வீட்டை காலி செய்து வெளியேறினர். இந்த கிராமத்தில் முகாம் இல்லாத காரணத்தினால் எங்கு செல்வது என தெரியாமல் மக்கள் தவித்து வருகிறார்கள்.

தங்களுக்கு நிரந்தர தீர்வாக கொள்ளிடத்தின் கரையை உயர்த்தி பலப்படுத்த வேண்டும் என பலமுறை கோரிக்கை வைத்தும் அரசு எந்த நடவடிக்கை எடுக்கவில்லை என்றும் புகார் தெரிவித்துள்ளனர்.

திருச்சி:

காவிரி நீர்ப்பிடிப்பு பகுதிகளில் பெய்து வரும் தொடர் மழையால் கர்நாடக மாநிலத்தில் உள்ள கிருஷ்ணராஜசாகர், கபினி அணைகள் நிரம்பி உபரி நீர் திறந்து விடப்பட்டது. இதனால் மேட்டூர் அணைக்கு மீண்டும் நீர்வரத்து அதிகரித்தது.

கடந்த மாதம் 30-ந்தேதி 31 ஆயிரம் கனஅடியாக இருந்து நீர்வரத்து மறுநாள் 42 ஆயிரமாக உயர்ந்தது. இதனால் மீண்டும் மேட்டூர் அணையில் 16 கண் மதகுகள் வழியாக காவிரியாற்றில் தண்ணீர் திறக்கப்பட்டது.

ஏற்கனவே டெல்டா பாசனத்திற்காக மேட்டூர் அணையில் இருந்து 15 ஆயிரம் கனஅடி தண்ணீர் திறக்கப்பட்டு இருந்தது. தற்போது அணைக்கு நீர் வரத்து கணிசமாக அதிகரித்துள்ளதால் முழு கொள்ளளவை எட்டியுள்ள நிலையில் உபரிநீர் அப்படியே காவிரியாற்றில் திறக்கப்படுகிறது. இன்று காலை 9 மணி நிலவரப்படி மேட்டூர் அணையில் இருந்து 2 லட்சம் கனஅடி தண்ணீர் திறக்கப்படுகிறது.

இந்த தண்ணீர் நாமக்கல், கரூர் மாயனூர் வழியாக முக்கொம்பு மேலணைக்கு கரைபுரண்டு வருகிறது. இன்று காலை 4 மணி நிலவரப்படி திருச்சி முக்கொம்பு மேலணைக்கு 1 லட்சத்து 40 ஆயிரம் கனஅடி தண்ணீர் வந்துகொண்டிருந்தது. அதில் 55 ஆயிரம் கனஅடி நீர் காவிரி ஆற்றிலும், 85 கனஅடி நீர் கொள்ளிடம் ஆற்றிலும் திறக்கப்பட்டுள்ளது.

இதனால் காவிரி மற்றும் கொள்ளிடம் ஆறுகளில் வெள்ளம் பெருக்கெடுத்து ஓடுகிறது. ஏற்கனவே கடந்த 2 நாட்களுக்கு முன்பு கொள்ளிடம் ஆற்றில் 5 ஆயிரம் கனஅடி நீர் வந்த நிலையில் சலவைத்தொழிலாளர்கள் துவைத்து உலர வைத்திருந்த 5 ஆயிரத்திற்கும் மேற்பட்ட ஆடைகள் தண்ணீரில் அடித்து செல்லப்பட்டன.

ஆனால் தற்போது 85 ஆயிரம் கனஅடி தண்ணீர் சீறிப்பாய்ந்து செல்வதால் கரையோர பகுதி மக்கள் உடனடியாக அங்கிருந்து வெளியேறுமாறு உத்தரவிடப்பட்டுள்ளது. கரையோர பகுதிகளில் கால்நடைகளை மேய்ச்சலுக்கு விடுவதை தவிர்க்கவும் அறிவுறுத்தல்கள் வழங்கப்பட்டுள்ளது.

முன்னதாக கடந்த 2 வாரங்களுக்கு முன்பு காவிரியில் 30 ஆயிரம் கனஅடி தண்ணீர் திறக்கப்பட்டபோது திருச்சி மாவட்டம் உத்தமர்சீலி, திருவளர்ச்சோலை உள்ளிட்ட பகுதிகளில் வயல்களுக்குள் வெள்ளநீர் புகுந்தது. இதனால் பல ஆயிரம் ஏக்கர் வாழை, கரும்பு சேதம் அடைந்தது. அதேபோல் பூக்கள் சாகுபடியும் பாதிக்கப்பட்டது.

ஆனால் தற்போது காவிரியாற்றில் 55 ஆயிரம் கனஅடி தண்ணீர் பெருக்கெடுத்து செல்வதால் மீண்டும் பாதிப்பு அதிகரித்துள்ளது. காவிரிக்கும், கொள்ளிடத்திற்கும் இடைப்பட்ட பகுதியான கல்லணை சாலையில் அமைந்துள்ள உத்தமர்சீலி பகுதியில் இன்று காலை சுமார் 200 ஏக்கர் பரப்பளவில் வாழை பயிர்களை வெள்ளநீர் சூழ்ந்து மூழ்கடித்து வருகிறது.

அதேபோல் சாலையையும் மூடியவாறு தண்ணீர் பெருக்கெடுத்து ஓடுகிறது. ஆறு, வயல், சாலை அனைத்தும் ஒரே இடமாக காட்சி அளிப்பது போல் தண்ணீர் சென்று கொண்டிருக்கிறது. ஆனால் இன்னும் சில மணி நேரங்களில் நீர்வரத்து மேலும் அதிகரிக்க வாய்ப்பு உள்ளதாக நீர்வளத்துறை அதிகாரிகள் தெரிவித்துள்ளனர். இதனால் உத்தமர்சீலி பஞ்சாயத்துக்கு உட்பட்ட குடியிருப்பு பகுதிகளுக்கு உள்ளேயும் வெள்ளநீர் சூழும் நிலை ஏற்பட்டுள்ளது.

இதுபற்றி உத்தமர்சீலி பகுதியை சேர்ந்த விவசாயி ஒருவர் கூறுகையில், ஏற்கனவே காவிரியாற்றில் திடீரென்று கூடுதல் தண்ணீர் திறக்கப்பட்டதால் வாழை பயிர்கள் சேதமடைந்தன.

இந்த நிலையில் தற்போது மீண்டும் 55 ஆயிரம் கனஅடி தண்ணீர் திறந்து விடப்பட்டுள்ளதால் 200 ஏக்கர் வாழை தண்ணீரில் மூழ்கிவருகிறது. இதனை எந்தவொரு அதிகாரியும் பார்வையிட வரவில்லை. இதேபோல் தண்ணீர் வந்து கொண்டிருந்தால் உத்தமர்சீலி பஞ்சாயத்து குடியிருப்புகளும் பாதிக்கப்படும் என்றார்.

இதற்கிடையே நேற்று நள்ளிரவில் திருச்சி மாவட்ட கலெக்டர் முக்கொம்பு மேலணைக்கு சென்று ஆய்வு நடத்தினார். அதிக அளவில் தண்ணீர் செல்வதை பார்வையிட்ட அவர் உரிய பாதுகாப்பு நடவடிக்கைகளை மேற்கொள்ளவும், விழிப்புணர்வுடன் பணியாற்றிடவும் அலுவலர்களுக்கு உத்தரவிட்டார்.

இதையடுத்து காவிரியாற்றில் கூடுதல் தண்ணீர் வெளியேற்றத்தால் திருச்சி கம்பரசம்பேட்டை பகுதியில் உள்ள கங்காரு மனநல காப்பகத்திற்கு சென்றார். அங்கு தங்க வைக்கப்பட்டுள்ள நபர்களை பாதுகாப்பான இடத்திற்கு மாற்றிட உத்தரவிட்டு அதற்கான நடவடிக்கைகளை முடுக்கிவிட்டார்.

திருச்சி:

திருச்சி முக்கொம்பு கொள்ளிடம் அணை மதகு உடைந்ததை சீரமைக்கும் பணி நடைபெற்று வருவதை தொடர்ந்து அங்கு சுற்றுலா பயணிகள் செல்ல தடை விதிக்கப்பட்டுள்ளது.

உடைந்த அணையை முதல்வர் எடப்பாடி பழனிசாமி பார்வையிட்டு புதிய அணை கட்ட உத்தரவிட்டு சென்றுள்ள நிலையில் தற்போது தற்காலிக அணை சீரமைப்பு பணி நடைபெற்று வருகிறது.

இந்த நிலையில் முக்கொம்பு அணையை பார்வையிட தி.மு.க. தலைவர் மு.க.ஸ்டாலின் நாளை 2-ந்தேதி மாலை திருச்சி வருகிறார். இரவில் திருச்சியில் தங்கும் அவர் மறுநாள் திங்கட்கிழமை காலை முக்கொம்பு கொள்ளிடம் அணையை பார்வையிட செல்கிறார்.

அவருடன் முன்னாள் பொதுப்பணித்துறை அமைச்சரும், தி.மு.க. பொருளாளருமான துரைமுருகன், திருச்சி மாவட்ட செயலாளர் கே.என்.நேரு, மற்றும் எம்.எல்.ஏக்கள் செல்கின்றனர்.  #mukkombudam

பெரம்பலூர்:

பெரம்பலூரில் அம்மா மக்கள் முன்னேற்ற கழக துணை பொதுச்செயலாளர் டி.டி.வி.தினகரன் நிருபர்களுக்கு பேட்டியளித்தார். அப்போது நிருபர்களுக்கு கேட்ட கேள்விகளுக்கு அவர் அளித்த பதில்கள் வருமாறு:-

கே: அ.தி.மு.க. பற்றி பேசுவதற்கு தகுதியில்லை என்று அமைச்சர் கடம்பூர் ராஜூ கூறியுள்ளாரே?

ப: அ.தி.மு.க.வில் குற்றச்சாட்டுக்கு ஆளானவர். போட்டி தி.மு.க.வில் இருந்து கொண்டு அம்மாவின் போட்டோவை எரித்தவருக்கெல்லாம் பதில் சொல்ல தேவையில்லை. யாருக்கு அருகதை உள்ளது என்பதை தேர்தலின் போது மக்கள் நிரூபிப்பார்கள்.

கே :அ.தி.மு.க.வை பலப்படுத்த தனது பதவியை ராஜினாமா செய்வேன் என்று ஓ.பி.எஸ்.கூறியுள்ளாரே?

ப :மீண்டும் தர்மயுத்தம் நடத்தியது போல ஏதாவது செய்யப்போகிறாரா?, போகாத ஊருக்கு வழி சொல்லிக்கொண்டு இருக்கின்றனர்.

கே: முக்கொம்பு அணை உடைப்பு பற்றி முதல்வர் கூறியது பற்றி?

ப:அணைகளை முறையாக பராமரிக்க வேண்டும். அவ்வாறு செய்யாமல் வெறும் பெயிண்ட் மட்டும் அடித்து விட்டு அதற்கு உண்டான நிதியை சுவாகா செய்ததால்தான் முக்கொம்பு மேலணை இடிந்து விழுந்துள்ளது. தேர்தல் நேரத்தில் மக்கள் பதிலடி கொடுப்பார்கள்.

இவ்வாறு அவர் கூறினார்.

மேலும் தி.மு.க.வில் மு.க.ஸ்டாலின், மு.க.அழகிரி ஆகிய இருவரில் சிறந்த தலைமையை முடிவு செய்ய வேண்டியது தி.மு.க. தொண்டர்கள்தான் என்றார்.