வெள்ளை மாளிகை பத்திரிகையாளர் சங்க இரவு விருந்து அமெரிக்க தலைநகர் வாஷிங்கடனில் உள்ள ஹில்டன் ஓட்டலில் இந்திய நேரப்படி இன்று அதிகாலை நடைபெற்றது.
இதில் அமெரிக்க அதிபர் டிரம்ப், அவரின் மனைவி மெலனியா, துணை அதிபர் வான்ஸ் உள்ளிட்டோர் பங்கேற்றனர். நிகழ்வு நடந்துகொண்டிருக்கும் அங்கு புகுந்த மர்ம நபர் துப்பாக்கிச்சூடு நடத்தினார்.
விருந்து நிகழ்ச்சியின் போது சுமார் எட்டு முறை துப்பாக்கி சுடப்பட்ட சத்தம் கேட்டதாக நேரில் பார்த்தவர்கள் தெரிவித்துள்ளனர்.
துப்பாக்கிச் சத்தம் கேட்டவுடன் பாதுகாப்பு அதிகாரிகள் அதிபர் டிரம்ப், மெலனியா ட்ரம்ப் மற்றும் துணை அதிபர் ஜே.டி. வான்ஸ் ஆகியோரைச் சூழ்ந்து கொண்டு பாதுகாப்பான இடத்திற்கு அழைத்துச் சென்றனர்.
கடந்த 3 ஆண்டுகளில் டிரம்ப் மீது நடக்கும் 3 வது கொலை முயற்சி இதுவாகும்.
முன்னதாக 45 ஆண்டுகளுக்கு முன்பு வாஷிங்கடனில் உள்ள இதே ஹில்டன் ஹோட்டலில் அப்போதைய அமெரிக்க அதிபர் டிரம்ப் ரொனால்டு ரீகன் மீதும் துப்பாக்கிச்சூடு நடைபெற்றது.
1981 மார்ச் 30 அன்று, இதே ஹில்டன் ஹோட்டலில் உரையாற்றிவிட்டு வெளியே வந்த அப்போதைய அதிபர் ரொனால்ட் ரீகன் மீது ஜான் ஹின்க்லி ஜூனியர் என்ற நபர் ஆறு முறை துப்பாக்கியால் சுட்டார்.
ஒரு குண்டு ரீகனின் மார்பில் பாய்ந்தது. அவர் உயிருக்கு ஆபத்தான நிலையில் ஜார்ஜ் வாஷிங்டன் பல்கலைக்கழக மருத்துவமனையில் அனுமதிக்கப்பட்டு, தீவிர சிகிச்சைக்குப் பின் உயிர் பிழைத்தார். இந்தச் சம்பவத்தில் மேலும் மூன்று பேர் காயமடைந்தனர்.
ரீகன் மீதான தாக்குதலுக்குப் பிறகு, அவசர காலங்களில் அதிபரை விரைவாக வெளியேற்ற ஹோட்டலின் நுழைவாயில் அருகே Presidential Suite என்ற சிறப்பு பாதுகாப்புப் பாதை உருவாக்கப்பட்டது.
நேற்று இரவு துப்பாக்கிச் சத்தம் கேட்டவுடன், இந்தச் சிறப்புப் பாதையைப் பயன்படுத்தியே சீக்ரெட் சர்வீஸ் அதிகாரிகள் டிரம்ப் மற்றும் மெலனியாவை துரிதமாக பாதுகாப்பான இடத்திற்கு அழைத்துச் சென்றனர்.
இந்தத் தாக்குதலில் ஒரு சீக்ரெட் சர்வீஸ் அதிகாரி மீது குண்டு பாய்ந்த போதிலும், அவர் புல்லட் புரூஃப் ஆடை அணிந்திருந்ததால் காயமின்றி தப்பினார்.
45 ஆண்டுகளுக்கு பிறகு, அதே இடத்தில் மீண்டும் ஒரு அதிபர் இலக்கு வைக்கப்பட்டது மிகப்பெரிய பாதுகாப்பு குறைபாடாகவே கருதப்படுகிறது.
துப்பாக்கிச் சூடு நடத்திய 31 வயது கோல் தாமஸ் ஆலன் போலீஸ் காவலில் உள்ளார்.