திருச்செந்தூர் அய்யா வைகுண்டர் அவதாரப்பதியில் இன்று ஆடித்திருவிழா கொடியேற்றம்

திருச்செந்தூர் கடற்கரையில் அமைந்துள்ள அய்யா வைகுண்டர் அவதாரப்பதியில் 11நாட்கள் நடைபெறும் ஆடித்திருவிழா இன்று காலையில் கொடியேற்றத்துடன் தொடங்குகிறது.

திருவிழாவை முன்னிட்டு இன்று (வெள்ளிக்கிழமை) அதிகாலை 5 மணிக்கு உகப்படிப்பு, பணிவிடை, காலை 6 மணிக்கு கொடியேற்றம் நடக்கிறது. கொடியை அய்யாவழி அகிலத் திருக்குடும்ப மக்கள் சபை தலைவர் வள்ளியூர் எஸ். தர்மர் கொடியேற்றுகிறார். தொடர்ந்து 7 மணிக்கு புஷ்ப வாகனத்தில் அய்யா பவனிவருதல், காலை 9 மணிக்கு அன்ன தர்மம், பகல் 12 மணிக்கு உச்சி படிப்பு, பணிவிடை, பகல் 1 மணிக்கு அன்ன தர்மம், மாலை 4 மணிக்கு உகப்படிப்பு, பணிவிடை 5 மணிக்கு புஷ்ப வாகன பவனியும் மாலை 6 மணிக்கு அன்ன தர்மம் வழங்குதல் நடக்கிறது.

இரண்டாம் திருவிழாவான 23-ந் தேதி (சனிக்கிழமை) முதல் 10ம் திருவிழா 31-ந் தேதி வரை காலை 6 மணிக்கு உகப்படிப்பு, பணிவிடை, மாலை 6.30 மணிக்கு பால் அன்ன தர்மம், 9 மணிக்கு அன்ன தர்மம், பகல் 12 மணிக்கு உச்சிப்படிப்பு, பணிவிடை மதியம் 1 மணிக்கும், மாலை 6 மணிக்கும் அன்னதர்மம் நடக்கிறது. மாலை 4மணிக்கு உகப்படிப்பு, பணிவிடை நடக்கிறது.

விழாவின் சிகர நிகழ்ச்சியாக 11-ம் திருவிழாவான, 1-ந் தேதி (திங்கட்கிழமை) பகல் 12.05மணிக்கு தேரோட்டம் நடக்கிறது. அன்று காலை 6 மணிக்கு உகப்படிப்பு, பணிவிடை, 6.30 மணிக்கு பால் அன்ன தர்மம், காலை 9 மணிக்கு அன்ன தர்மம் நடக்கிறது. தேரோட்டத்தை தமிழக மீன்வளம், மீனவர் நலம் மற்றும் கால்நடை பராமரிப்புத் துறை அமைச்சர் அனிதா ராதாகிருஷ்ணன் தேரை வடம் பிடித்து தொடங்கி வைக்கிறார். தொடர்ந்து பகல் 2 மணிக்கும் இரவு 8 மணிக்கும் அன்ன தர்மம், இனிமம் வழங்குதல் நடக்கிறது. நள்ளிரவு 1மணிக்கு அய்யா வைகுண்டர் காளை வாகனத்தில் பவனி வருதல் இரவு 2 மணிக்கு தர்மம், இனிமம் வழங்குதல் நடக்கிறது.

விழாவில் ஒவ்வொரு நாளும் மாலையில் அய்யா வைகுண்டர் புஷ்ப வாகனம், மயில், அன்னம், சர்ப்பம், கருடன், குதிரை, ஆஞ்சநேயர்,இந்திர ஆகிய வாகனத்தில் பவனிவருதல் நடக்கிறது.